Justin Bieber-a'n Justice World Tour a tikhawtlai leh

Canadian singer Justin Bieber chuan social media kaltlanga thuchhuah siamin 'Justice World Tour' a chhunzawm theih tawh rih dawn loh thu leh a tihkhawtlai a ṭul thu a sawi.

Thawhlehni khan Instagram-ah hemi chung-changah hian thuchhuah siamin,"Kumtir lamah khan Ramsay-Hunt Syndrome ka neih thu puangzarin, ka hmai lehlam a zen thu ka puangzar tawh. Chu ka damlohna kalzelah chuan Justice Tour North American-a ka neih mek pawh ka zo thei ta lo a ni.

"Stage ka chhuahsan hnuah ka chau hle a, chutaṭang chuan ka hriselna chu ka ngaihpawimawh hmasak a ngai tih ka inngaihtuah chhuak ta a ni," tia sawiin a tour neih mek chu a chawlhsan lailawk rih dawn tih a sawi.

Justin Bieber hian June thla tir lamah khan Ramsay-Hunt Syndrome vangin a tour neih mek chu a tihkhawtlai a ṭul thu a sawi a, hung eng emaw chen a chawlh hnuah tour chu a chhunzawm leh a, mahse Thawhlehni khan chu pawh chu a chawlhsan lailawk rih a ṭul thu a sawi leh ta a ni.