Van boruaka hmeichhe awm rei ber record siamtu Christina Koch

NASA astronaut Christina Koch chuan hmeichhe zinga van boruaka awm rei ber record a siam.

Ningani khan Christina Koch hian khawvel a rawn thleng leh a, International Space Station-ah thla 11 dawn zet awmin, ni 328 hun a hmang. ISS-ah hian  European Space Agency-a mi Luca Parmitano leh Russian space agency-a mi Alexander Skvortsov-te nen an awm a,  Russian Soyuz spacecraft hmangin khawvelah hian a rawn ṭum leh a ni.

Central Kazakhstan-a Dzhezkazgan bulah an spacecraft hi a ṭum a, an space­craft aṭanga a chhuak lai thlalak aṭang chuan Koch hi a hlim hle tih a hriat.

 "Tunah hian hlimnain ka khat a ni," tiin Koch chuan a sawi nghal. NBC News hnenah microgravity a ngaih dawn thu sawiin, duh hun huna ceiling leh chhuat inkara sawh kual vel theih chu nuam a tih thu a sawi bawk.

Kazakhstan aṭang hian Houston-a NASA headquarters a pan nghal a, hetah hian a hriselnate enfiah zui a ni ang.

NASA scientist-te hian Mars-ah mihring tir tura hma an lak mek lai a nih avangin Koch medical data hi NASA tan chuan hlu hle tura ngaih a ni.

Nikum March 14 khan van sangah hian a inkap chhuak a, Ningani khan a lo kir leh chauh a ni.

Kum 41 mi a ni a, Electrical Enginee­ring-ah Bachelor degree neiin Electrical Engineering Master of Science a ni bawk. Michigan-a piang niin 2001 khan GSFC-a NASA Academy aṭangin a graduate a ni.

Kum 2013 June-ah khan  Astronaut Group 21-a tel turin NASA-in an thlang a, kum hnih zet training a nei nghe nghe. Kum 2019 March 14 khan Expedition 59/60/61 crew zawmin  Aleksey Ovchinin leh Nick Hague-te nen van boruakah hian Soyuz MS-12 hmangin an inkap chhuak a ni.

•    US president Donald Trump chuan a Twitter-ah Koch a lawpui thu hi ziak nghalin, hmeichhia la naupang zawkteah phurna a thlen bakah USA tana inchhuanna a nih thu a sawi.

•    NASA veteran Peggy Whitson-i'n hmeichhia van boruaka awm rei ber record a lo siam tawh chu a khum. Whitson hi Kum 2016-17 khan ISS-ah ni 289 a awm.

•    Koch hi hmeichhe zinga 'spacewalk' nei hmasa ber pahnih zinga pakhat a ni bawk. NASA ṭraining laia a classmate Jessica Meir nen he 'history' hi an siam  ani.

•    ISS aṭanga khawvel rawn thlen leh nan hian darkar thum leh a chanve hun an hmang.

•    Space mission a neih lai hian Khawvel orbit 5,248 a zo hman a, km maktaduai 223 zet a zin hman tihna a ni. Hemi thui zawng hi Khawvel leh Thla inkar vawi 291 chhuk chhoa kal nen a inhen vel.

•    US record Scott Kelly siam aiin ni 12 chiahin van boruakah hian a awm tlem zawk.

•    Van boruaka awm rei ber record siamtu chu Valery Polyakov (Russia) a ni a, space station-ah ni 437.7 a awm.