JB leh Quavo-te'n music video ṭha 'Intentions' an tichhuak

Valentine's Day-ah hian album thar a tlangzarh tawh dawn nachungin Justin Bieber chuan nimin khan Quavo nena an thawhdunna music video 'Intentions' a tichhuak.

'Intentions' hi a album thar tur 'Changes'-a track pakhat a ni a, a music video hian fak a hlawh hle.  Michael Ratner direct niin,  Alexandria House-a hmeichhia leh naupang ṭanpui ngaite ṭanpuina tur campaign-na ni pah fawmin an tichhuak a, YouTube-a a dahchhuahah phei chuan donation pekna tur link a dah tel hial.

JB hian a album tharah hian Travis Scott, Summer Walker, Post Malone, Clever leh Lil Dicky-te pawh a thawpui a, he album a hla tho 'Yummy' leh 'Get Me'-te chu a lo tichhuak tawh bawk.

Justin Bieber chuan a ropuina platform YouTube-ah mel lung pawimawh a phum leh ta a, subscriber maktaduai 50 nei tling thei hmasa ber a ni a, subscriber mtd 50.1 a nei der tawh. JB-a dawtah hian Ed Sheeran a awm a, subscriber mtd 43.4 a nei.

A manager Scoo­ter Braun-in a hmuh­chhuahna hmun pawh YouTube tho hi a ni a, thlirtu tluklehdingawn nei tling hmasa ber record a siam tawh bawk.