Actor sum lalut hnem ber Mark Wahlberg

Mark Wahlberg chu actor zinga sum lalut hnem ber a ni a, thla 12 chhungin USD mtd 68 zet a lalut. Nikum khan top 10-ah pawh a lang pha lo a, kuminah erawh chuan a sum lakluh a pung hle. Nikum khan USD mtd 30 chauh a lalut a, kumin hian nikum aiin a let aia tam sum a lalut.

Actress sum lalut hnem ber leh actor sum lalut hnem ber sum lakluh zat a inthlau hle. Hmeichhe lama sum lalut hnem ber chu La La Land changtunu Emma Stone kha a ni a, USD mtd 26 chauh a ni a, Mark Wahlberg-a sum lakluh zatve pawh a tling lo a ni.

Sum lalut hnem ber pahnihna chu Dwayne ‘The Rock’ Johnson a ni a, USD mtd 65 a lalut. The Rock hi nikuma sum lalut hnem ber kha a ni a, kumin chu Wahlberg a tluk pha lo tlat. Pakhatna ni pha lo mah se, nikum ai chuan sum a lalut hnem tho a, nikum khan USD mtd 64.5 a lalut.

Vin Diesel chu sum lalut hnem pathumna a ni a, USD mtd 54.5 a lalut a, Adam Sandler chuan USD mtd 50.5 lalutin palina a ni pha. Jackie Chan chuan USD mtd 49 lalutin pangana a ni. Pakhatna pawh lo ni ṭhin Robert Downey Jr. chu parukna niin, USD mtd 48 a lalut a, Tom Cruise chuan USD mtd 43 lalutin pasarihna a ni.

Pariatna aṭanga 10-nate hi Bollywood actor lar an ni a, Bollywood-ah hian sum a tamzia a lang awm e. Sum lalut hnem pariatna hi India mipuiten an ngaihsan, Shah Rukh Khan a ni a, USD mtd 38 zet a lalut a, a hnuai chiahah USD mtd 37 zet lalut thei Salman Khan a awm. Akshay Kumar chu 10-na a ni a, USD mtd 35.5 a lalut.

Forbes chanchinbuin sum lalut hnem a tarlanah, actor zingah bik Mark Wahlberg chu sum lalut hnem ber a ni a, nikum nena khaikhinin a sum lakluh a pung hle. Kumin hian sum lalut hnem 10 zingah Bollywood actor pathum an lang.