YouTube subscriber mtd. 80 Nei tling hmasa ber Blackpink

K-Pop group lar Blackpink chuan YouTube-ah mellung pawimawh tak an phum leh ta. Artist zingah YouTube-a subscriber maktaduai 80 nei tling thei hmasa ber record Ningani khan an siam.

Hmanni lawk, June 28 khan Jisoo, Jennie, Lisa leh Rosé-te hian subscriber mtd. 75 an nei tling a, chuta ṭang chuan thla hnih em pawh a la ral lo tihah mtd. 80 an nei tling leh der mai.

Blackpink hian nikum September thla khan YouTube-a artist subscriber ngah ber record an lo siam tawh a, Justin Bieber record lo siam tawh chu khumin chumi hnu aṭang chuan he dinhmun hi an la luah chho ta char char a ni. Justin Bieber hian hun eng emaw chen chhung chu subscriber ngah ber record hi a chelh a, mahse tunah chuan khawchhak lungpui lian pahnih Blackpink leh BTS chuan subscriber an ngah tawh zawk.

BTS chu subscriber ngah ber dawttu niin mtd 70.6 an nei a, pathumna chu Beiber niin mtd 70 a nei ve bawk.

Blackpink hian an single thar 'Pink Venom' music video an tihchhuah hnuah he mellung pawimawh tak hi an phum zui a ni. Kar thum liam ta khan 'Pink Venom' hi an tichhuak a, a Dance Practice video pawh kar hnih vel liam ta khan an tichhuak leh bawk. 'Pink Venom' hian tunah hian YouTube-ah thlirtu mtd 272 lai a nei leh tawh a, an dance practice video ringawt pawh hian mtd 56 a nei leh der tawh!

Lisa leh a ṭhiante hian 'Pink Venom' hmang hian kumina MV chhuak tawh zinga darkar 24 chhunga thlirtu ngah ber record siam tawh bawkin ni khat chhung lekin mtd 90.4-in an thlir hman. Hei hi YouTube-a MV tihchhuah tawh zawng zawng aṭanga thlirtu tam ber pathumna a ni bawk.

BORN PINK-a hla awm turte chu...
Blackpink chuan an album pahnihna tur 'Born Pink'-a hla awm turte an puangzar tawh a, karleh Zirtawpni hian an album thar hi an tlangzarh ang. Hla pariat a awm dawn a, an Instagram account lamah credit zawng zawng nen an pholang tawh.

Born Pink tracklist:-
1 Pink Venom
2 Shut Down
3 Typa Girl
4 Yeah Yeah Yeah
5 Hard to Love
6 The Happiest Girl
7 Tally
8 Ready For Love