Feli Fanai MPL kick off-ah a pheichheh a khai dawn!

Zanin dar 8 hian Chanmari YMA Hall-ah MPL Kick Off a ni dawn a, hetah hian Feli Fanai music video thar, kum­ina a music video pahnih­na tur chu tlangzarh a ni dawn. He music video hi 'Pheichheh mawi i khai ang aw' tih a ni a, MPL kick off zana tlangzarh a nih avangin a hla thu hi football nena inzawm erawh a ni kher lo.

'Pheichheh mawi i khai ang' tih hla hi Myztic Sailo phuah a ni a, a music hi Lal K. Sailo siam niin, video hi Atea, ROAR kutchhuak a ni. A music kalhmang hi hip-hop lam a ni a, amah Feli Fanai ngei pawh a rap nghe nghe. A music a tunlai ang bawkin a video pawh a tunlai dawn a, gym pûm chhuak ni âwm tak takten Feli Fanai an hual velna music video hi hmuh a chakawm tawh hle.

Thlalak a tihchhuah vel aṭang ringawt pawhin a sexy hmel khawp mai a, hei vang hian Feli Fanai chuan a music video avang hian sawiselna pawh a tawh a inring. Chutiang dawng turin amah Feli pawh a inpeih tawh! "Sawiselna pawh a awm mai thei a ni. Party song lam, hip-hop lam a ni a, tunlaiah chuan a hralh a kal ka ring ve tawp" a ti.

'Pheichheh mawi i khai ang' video hi a siam hun chhung a rei loh ngaihtuah chuan a ngaihtuah hun chhung a rei thung. Uluk taka rua­hman a ni a, a siam dan tur ngaihtuah hun chhung a rei a, rilrua ruahmanna an siam peih hnuah erawh thil tih a awlsam a, a video hi ni hnih chhung chauh shot a ni thung. Feli Fanai tan kumina a music video pahnihna tur a ni a, ani hi tunlai Mizo hmeichhe zaithiam, lengzem sa zinga hlawhtling ber pawl a ni. Tuna a video pawh chart lamah beisei a sang hle.