Liandingpuii a insiam thar ; Kum 10 chuang a ral hnuah album thar

Nu a nih tawh hnuah music lamah siam thar a ni a, beram bo chauh ni loin Liandingpuii chuan Project Siamtharlehna a buaipui.

Liandingpuii hian fakna hla hrang hrang a lo sak tawhte aṭangin Project Siamtharlehna live music video album buatsaihin hma a la mek a, zanin pawh hian live shooting an nei dawn. Live shooting a neihna tur pawh a uluk hle a, MZU Multipurpose Hall lamah a inbun thla a, zanin dar 7 aṭang hian shooting hi ṭan a ni ang.

Live shooting turah hian musician pawh a nei ṭha hle a, Eric-a leh Ephraim-a te chu guitarist an ni dawn a, keyboardist hi Lalhriatrenga leh Mesa, bassist-ah Kimkima, Chanmari, drummer hi H. Vanlalthuama te an ni a, woodwind lam (phaiphuleng etc.) hi Zothanmawia’n a khawih bawk ang. Arini, Henry Varte, C. Zaithanpuia leh Mavuana ten an zaipui bawk ang. He hunah hian Upa C. Ngurthnatluanga’n thu a sawi ang.

Dingpuii hian, “Tuna ka album tur hi album ka lo tihchhuah tawha a ṭha ka tihte dahkhawmna tur ang chi a ni. Pathian hnathawh a niang, nikum lam aṭang khan ka rilruah a awm tawh a, tichuan hma kan la chho ta a ni. He album hi ka tan thlarau nuna insiamtharlehna tur a ni a, mi tan pawn thlarau nuna anmahni siamthartu ni thei se ka duh a ni. A ṭha thei ang bera siam ka tum a, Pathian tan a ṭha thei ang ber pek ka duh a ni,” a ti.

Dingpuii hian English album nen album pali a tichhuak tawh a, a album tihchhuah hnuhnung ber kha kum 2005-a a tihchhuah a ni. Tunah chuan a fate pawh an lian deuh tawh a, rimawi lam pawh a luhchilh leh thei deuh ta. A album hi kumin October thlaa tihchhuah hman a inbeisei.