Chris Tomlin-a'n hla thar 'Be The Moon' a tlangzarh

Christian music singer lar leh worship leader ṭha tak ni bawk Chris Tomlin chuan Thawhlehni khan hla thar 'Be The Moon' a tichhuak.

'Be The Moon' hi a album tihchhuah thar tur 'Chris Tomlin & Friends'-a mi tur a ni a, he hlaah hian Brett Young leh Cassadee Pope-te a thawhpui a;Corey Crowder leh Tyler Hubbard-te nena an phuah a ni thung. "He project-a artist ka thawhpuite hnena ka sawi ṭhin chu 'Be The Moon' hi he record inngahna a ni tih hi a ni," tia sawiin,"Thla(moon) hian thildang nih a tum ngai lo; a awmna tur dik taka awmin ni(sun) enna a rawn pe chhuak mai a ni. Chutiang chiah chu keiniah pawh hian a ni, enna keimahniin kan nei lo a, eng nasa zawk Pathian eng chu kan pe chhuak tur a ni. Chu chu Kristian nihna lairil ber chu a ni zawk.

"He hlaah ka ṭhian pahnih Brett Young leh Cassadee Pope-te'n min zaipui a, artist ropui tak an ni," a ti. Chris Tomlin hian a ṭhian ṭhenkhat thawhpuia a siam 'Chris Tomlin & Friends' album hi July 31 hian digital-in a tlang­zarh dawn a, August 28 aṭangin a copy pangngai chu lei tur a awm chauh thung ang. A album thara hla tur hi single-in a tichhuak nual tawh a, kar hmasa khan Thomas Rhett leh Florida Georgia Line a zaipuina 'Thank You Lord' chu tichhuak tawhin June thla tawpah khan Lady A (Lady Antebellum ṭhin kha) a thawhpuina 'Who You Are To Me' chu a tichhuak tawh bawk.

Grammy Winner Tomlin album thar turah hian hla 13 a awm dawn a,  khing kan tarlan tawh bakah hian country music artist dang eng emaw zat a thawhpui bawk a ni. A album 13-na tur a ni tawh dawn a, Thawhlehni pawh khan a record thar tur chungchang hi sawi lang lehin a music thar chu tihchhuah hlan a nghakhlel tawh hle tih a sawi. "Kan inkungkaihna, ṭhian ṭha tak kan nihna leh kan thawhhona hi thilpek a ni tawh hrim hrim. Ka tan chuan, a hlimawm ka tih ber lai chu Pathian roipuina atana music kan siam ho hi a ni," tiin a ṭhiante nena an thawhhona album tur chungchang hi a sawi a ni.