Top 5 intihsiakna boruak a sáng

Mizo Idol Season 7 Top 5-te intihsiak zan khatna chu Zirtawpni khan neih a ni a, constestant-te an che ṭha a; intihsiak zan hnihna, Thawhlehni zana an chet danin an hmalam hun a hril dawn.

Zirtawpni zan show hi Zonuni Pachuau chuan hneh taka host-in guest artist, Mizo Idol season 6 Top 11 Andrew Lalchhandamna chuan 'Seol Palai au aw' hmangin show a khuh hawng a, Mizo Idol season hmasa lama kan hmuh tawh R Lalmalsawmi leh Malsawmdawngkimi-te an rawn inlan zui bawk.

He mi hnu hian tun season-a Top 10 inhlangkai zo ta lo Lalchhandama Khiangte, Zodinpuii Sailo leh C Lalrindiki-te an rawn inlan leh. Top 10 inhlangkai zo lo mah se an zai thiam zia hretu chu thlirtu mipuite an ni. Chu chuan Mizo Idol contestant-te zai thiam zia a tilang chiang hle ti ila kan sawi sualin a rinawm loh.

Guest artist-te inlan zawh hian intihsiakna ṭan zui a ni.

Mipui vote lak a ni leh dawn a, a hma chuan mipui vote hmu sang ber kha tlinga puan nghal a ni ṭhin. Mahse Top 5 aṭang erawh chuan vote hi judge pakhat anga ngaih a ni tawh ang.

Top 5 intihsiakna zawh hnu lawkah social media platform hrang hrangah mipuite vote turin contestant-te zai an chhawp chhuak nghal a ni.

Hla thlang sual ngai lo David A ṭha tluan teuh?
Intihsiakna khuh hawngtu chu tudang ni loin mipui atchilh rawn David Lalchawisanga Darlong a ni. Albatros hla 'I tel lo chuan' chu mawi tak maiin a rawn sa a, a zai enin amah a ṭang tih a hriat bawk a, a fan-te lam tan chuan a zai chhunga lo ṭhut hle hle a har hle ang tih a rinawm.

Top 5-a mipa awm chhun David-a hian intihsiaknaa a tel chhung hian chetsual a la nei lo, tiin a sawi theih a, Zirtawpni zan pawh khan a zai ṭha lehpek hle. Amaherawhchu, Zirtawpni zan bika a zai kha uluk taka ngaihthlak chuan a ṭang ulh ṭep em aw a tih theih thung.

"I hla kha lo record ta ila chu, a ṭha tluan teuh," tiin endiktu Azautea chuan a sawi a, Vari phei chuan,"National platform mai pawh ni loin, international platform-ah pawh nang hi chu vawm chhuak che ila, mi tam takin an duh che ka ring," tiin a sawi hial.

Robin-a'n, "Azautea khan, hla i thlang thiam a ti a, mahse lehlam zawnga ka teh chuan.. i hla thlan engah pawh khan i in-adapt thei," tia a sawi chuan David-a special-na a sawi chhuak chiang hle awm e.

Deborah tan a theihna phochhuahna hla a sak a ṭul em?
Kumin Mizo Idol-a huhang ngah ber zinga mi, Lunglei nula Deborah VL Hmangaihi chuan H Lalmuankimi'n thiam taka a sak ṭhin 'Ka hmangaih che asin' hmangin intihsiakna a rawn hmachhawn.

Rinlawk ang ngeiin a zai chhe lo mai ni loin a zai ṭha a, a zai a ngaihnawm lehpek hle. Mahse, a hla thlanin a thiamna/theihna a pho chhuak zo tawk lo deuh em aw, tih ngaihdan erawh a neih theih. Top 5 intihsiak zan hnihnaah a ṭan lehzual a ngai dawn.

Endiktute pawhin a zai an fak hle a, Robin-a chuan,"I hla sak a range a zau lutuk lo a.... mahse range zimte pawh sa nalh hleithei lo tam tak an awm. I hla thlan reng reng hi sawisel tur zanin pawh khan a vang leh khawp mai. I zai hian hnun (charm) a nei a, chu chu i hmang thiam," tiin a comment.

Vari'n,"I theihna i hre chiang a, chumi chhungah chuan ngeiawm miah si loin i che thiam," a ti ve thung.

Azautea'n,"Hla pawh i thlang fuh viauin ka hria, i sak awm tak i sa," tiin a sawi ve bawk. Robin-a'n endiktute comment kharin, skills phochhuahna ang chi, amaha theihna awm pho chhuak thei tur rawn tilang se a duh thu a sawi.

C Vanlalroluahtumi zai vitamin ṭha
Saichal nula C Vanlalro-luahtumi (Vli) chuan Kristian hymn ropui tak mai 'Pathian hmangaihna ropui zia' chu ropui takin a rawn sa a, a zaiah sawisel tur a vang. Sawisel tur a vang mai a ni lo, a zai nung takzet a, Pathian fakna hla a nih angin a nihna tur ang takin a rawn sa chhuak. Tun intihsiak chhunga a zai ṭhat ber zan ni hialin mi tam tak chuan an ngaih a rinawm a, a hniamah leh a sangah a chesual lo, a zai ṭha tluan ṭhak.

Robin-a'n,"Spiritual lutukin i rawn sa chhuak a... i aw mawi sa khan hneh takin note tling thlapin i rawn ti kha a mawi viauin ka hria," tia sawiin a fak hle.

Vari pawhin,"A ngaihnawm lutuka, hnun i rawn keng e, ka lawm lutuk..Pathian chawimawi turin i rawn kal ni deuh tawpin ka hria," tiin a comment zui ve bawk.

Azautea chuan," I zai kha a vitamin ṭha hle mai," tiin a sawi ve bawk - fakna lawm hlir a ni a, zan khatnaah na na na chuan a ngaih a ṭha ang.

T Vanlalhmangaihi'n judge-te a barakhaih!
T Vanlalhmangaihi'n Lalṭanpuia Tochhawng hla 'Hmangaihna ka ngen a ni' hmangin judge-te leh mipui a barakhaih.

A intro line-a sa zo chiaha mipui thawm aṭang khan mipui a barakhaih tih a chiang. Hmangaihi hian Zofate hla hriat zawng tak mai chu style danglam takin a rawn sa. Zan danga a hla sak ṭhin nena khaikhin phei chuan Zirtawpni zana a zai dan style chu danglam tak a ni. Risk a la a, mahse a la sual lo niin a lang.

"Tunlai deuhin i rawn sa a, khatiang khan miin an sak leh sup sup ka ring a ni," tiin Azautea chuan Hmangaihi zai a comment.

Vari chuan,"Pu Lalṭanpuia sak dan bakin he hla hi chu sa an awm vak ngai lo... music style in rawn thlak dawrh.. i music genre mil chiahin i rawn zai chhuak," tiin a sawi.

Robin-a chuan,"Ka ṭhiante sawi ang deuh khan... min barakhaih khawp mai... Dangdai lutukin, nangma style-in i rawn cover a, kha kha i fing ka ti a, a scoring bawk," tiin a sawi hial.

Skills san vanga Top 5 thleng Lalngaihzuali
Intihsiakna khartu Lalngaih-zuali chuan H Lalrammawia lehlin, 'Pathian ropui rawh se' chu hneh tak maiin a rawn sa. Angaihi hian a theihna a hre chiang a, hla pawh a thlang huai hle. A zai ṭha a, a zai ropui bawk. A sang lai a 'hit' danin duhthu a sam lo deuh ṭhin tih lohah chuan a zai ṭha lehpek hle.

Azautea chuan,"Khami hla kha khawvel pum huap hla lar a ni a... i aw khan a hruai lap lap thei a, ngaihthlak a nuam. I che ropui khawp mai," tiin a sawi.

Vari chuan,"I theihna hrim hrim avang khan i hla sak dan ngaina lotute pawhin an duh che ka ring. Zan dang zawng aiin hnun i rawn keng ṭha," tiin a sawi bawk.

Robin-a chuan,"I skills avang liau liauin Top 5 i thleng a... ngaithlatute tan 'listening pleasure' a tlem ang tih erawh ka hlau," tiin inven a ngaihna lai a hrilh.