Friends special August-ah chang dawn?

Friends star David Schwimmer chuan mi tam takin an nghahhleh em em 'Friends' special chu August-ah an chan dawn thu a sawi.

Friends-a Ross Geller lema chang David Schwimmer chuan Jimmy Fallon The Tonight Show-ah hemi chungchang hi sawiin August thla laihawl velah an chang mai thei tih a sawi a, hetihrual hian thil chiang tak erawh a la ni lo tih a sawi tel thung. Kar khar emaw kar hnih emaw chhung vel chu film chan a him em tih chu an la enthla dawn tih a sawi a, a la him lo a nih erawh chuan an la nghak leh rih dawn a ni.

David hian a hmain 'Friends' reunion chu a danglam dawn hle tih a lo sawi tawh bawk. 'Friends' reunion special show-ah hian Friends star-te chu an inlan leh vek dawn tih a chiang tawh a, Matt LeBlanc, Jennifer Aniston, Courtney Cox, Matthew Perry leh Lisa Kudrow-te chu kan hmu leh vek dawn a ni.