Young Talented Artistes Award dawng

Kawng hrang hranga mithiam bik, ṭhalaite aṭanga thlan chhuaha chawimawina pek ṭhin, Young Talented Artistes Award chu North East Zone Cultural Centre (NEZCC), Ministry of Culture, Government of India, Dimapur chuan Raj Bhawan Durbar Hall, Itanagar, Arunachal Pradesh-ah P.B.Acharya, Arunachal Pradesh & Nagaland governor leh Chairman, NEZCC chuan mi 22 hnenah a hlan, heng zingah hian Mizo panga an tel.

Young Talented Artistes Award hi Sorkar laipuia Ministry of Culture-in a siam a ni a, kum tin, ṭhalai, thiam bik thlan chhuah, kum 18 aṭanga 30 inkarte hnenah hlan a ni ṭhin. Tun ṭum hian kum 2015-16 leh 2016-17 chhunga award dawngtute hnenah hlan a ni. Mizo zinga he chawimawina dawngtute hi kum 2015-16 bikah Zonunchami, Electric Veng, Aizawl (Painting); Lalhruaitluangi, Khatla (Painting); kum 2016-17 bikah Alyssa Lalrinsangi, Zarkawt (Painting); Andrew Lalrinzuala, Ramthar (Floral Handmade Craft); leh Lalhriatchhunga Fanai, Bethlehem (Drawing Painting) te an ni. Chawimawina hian certificate leh pawisa fai Rs. 10,000 a keng tel.