Kanye West-a’n Taylor Swift a vau

Taylor Swift-i’n album thar a tichhuak dawn tih a sawi a, a album hming tur pawh a puang chhuak tawh. Hemi thu hi Kanye West-a’n a lo hriat ve leh, Taylor Swift hi a vau nghal!

Taylor Swift hian a album tharah a nupui, Kim Kardashian West emaw, amah emaw pawh a beih vaih chuan a ngawi mai mai dawn bik lo tih Kanye West chuan a sawi. Swift leh West chhungkua hi an inhmu thiam lo viau. Kum 2009 khan MTV VMA-ah Taylor Swift-i’n Best Music Video a lak laiin, stage-ah West hi chhoin, Swift-i mic ken lai chu a chhuhsak a, a award dawn chu Beyonce-i’n dawng se a inhmeh zawk tur thu a sawi chiam. Hemi hnu hian an inkapin, an insâwt hlak hlak reng a, nikum khan buaina a zual leh deuh.

Nikum khan Kanye West chuan a hla ‘Famous’-ah Taylor Swift hi a tâwng a, amah avanga lar mai mai angin a sawi a, Swift sawi nan West hian ‘B***h’ ṭawngkam a hmang nghe nghe. Twitter lamah an inchaltauh nasa hle a, hemi kal zelah Kim Kardashian pawhin an inbiakna ni awm tak record a ti­chhuak nghe nghe a nih kha. Nikum Grammy-ah Taylor Swift chuan Kanye West sawi chhan takin thu a sawi zui ve leh bawk.

Hetianga an inhmuh thiam lohna kal chho zelah, tunhnaiah Swift-i’n album a tichhuak dawn tih a hriatin, Kanye West hian a lo hlauthawng nghal a nih hmel a, Taylor Swift hi a lo vau lawk a ni. Khawthlang chanchinbute chuan Kanye West hian a nupui fanaute a chhan hle dawn a, Taylor Swift hian a album tharah amah emaw, a nupui emaw sawiselna leh beihna a dah tel a nih ngat chuan, mi talent tak a ni a, a beihletna tur hla siam pawh a thiam ve em em tho niin an tarlang.