Super Bowl-ah Jay-Z leh Timberlake?
Super Bowl halftime show-a zai turah tunlai khawvela zaithiam ropui pahnih, Jay-Z leh Justin Timberlake te an be mek niin an sawi. Super Bowl hi nakkum February 4 khian Minneapolis-a US Bank Stadium-ah khelh a ni ang.
Khawvela live show ropui berte zinga mi, Super Bowl-a halftime laia zai pha nih hi thil namen lo tak a ni. Jay-Z leh Justin Timberlake hi an be tak tak a, an zai dawn a nih ngat chuan he live show hi a ropui lehzual ngawt ang. Justin Timberlake hi kum 2004 khan Janet Jackson nen Super Bowl halftime show-ah an lo inlan tawh a, hemi ṭum hian Janet Jackson chu wardrobe malfunction avangin a mualpho hle nghe nghe.
Jay-Z hian tunhnai khan album thar 4:44 a tichhuak a, Timberlake hian nakkum kum tir lam hian album tihchhuah a tum bawk. He show-a an zai thei a nih ngat chuan an album hralhna kawngah an tan chuan malsawmna a tling dawn a ni.