'Brahmastra' in tlangzarh karah Rs vbc 100 chuang lalut nghal

Ranbir Kapoor leh Alia Bhatt-te nupa channa, ‘Brahmastra’ chu September 9 khan tlangzarh a ni a, a hlawhtling nghal hle.

Box Office India report tarlan danin, he film hian Pathianni bikah Rs vbc 38-39 vel bawr a lalut a, ṭawng danga lehlin aṭangin Rs vbc 4 lalut bawkin, a belhkhawmin vbc 42-43 inkar a lalut der a ni.

Ayan Mukerji-a fantasy epic hian Indian box office bikah opening week aṭangin Rs vbc 120 lalutin, Hindi movie zinga sum lalut tam huangah a hming a chuang nghal der. He film hian ram dangah pawh en a hlawh hle a, Australia leh New Zealand chart-ah pakhatna niin, United States-ah pawh an khuhhawng ṭha hle. US box office tracker, Box Office Mojo tarlan danin, Brahmastra Part One-Shiva hian tlangzarh kar khatnaah khawvel pum huapin USD mtd 26.5 (Rs vbc 212) a lalut tih an sawi. Heng zinga USD mtd 4.4 chu US market lawng aṭanga rawn lut a ni. Brahmastra hian Bollywood film, tlangzarh kara sum lalut tam ber ni ṭhin, Sultan Rs vbc 206 chu a rawn khum a ni.

Ranbir Kapoor-te nupa bakah hian Bollywood lama mi hmingthang Amitabh Bachchan, Mouni Roy, leh Nagarjuna-te pawh an inlan a, Shah Rukh Khan leh Deepika Padukone pawh he film-ah hian hun tawite chhung an lo inlan ve bawk.