Taylor Swift hla thar en hlawh ; Kim K-i’n thungrul turin a pasal duh
Taylor Swift chuan a hla thar ‘Look what you made me do’ chu lyric video-in a tichhuak a, en a hlawh cher cher hle a, record a siam thar nghal.
Taylor Swift hian a hla thar ‘Look what you made me do’ chu lyric video-in Zirtawpni khan YouTube-ah a dah chhuak a, darkar 24 chhungin entu maktaduai 29 an awm nghal. A hmaa record siamtu chu Coldplay an ni a, darkar 24 chhungin maktaduai 9 entu an awm.
Digital lamah pawh Swift hla thar hi hralh a kal cher cher hle a, darkar 24 chhungin vawi nuai hnih download nghal a ni a, Pathianni liam thleng khan he hla hi 550,000 deuh thaw an hralh tling der. Kanye West a kahna nia ngaih a ni a, mahse chiang taka sawi fak tur erawh chu a awm lo.
A hla thuah hian Kanye West a sawi ni ngeia ngaih theih chu a awm nual. Hei vang hian Kim Kardashian pawh a ngawi mai mai duh lo, a pasal, Kanye West chuan Taylor Swift hi thungrul ngei se a duh. Kanye West nena an inkar vel hi a chhe chho zel dawn a nih hmel. Taylor Swift hian a album hi November 10-a tihchhuah a tum nia sawi a ni a, he ni hi Kanye West nu, Donda West thih champha phak vawi 10-na chiah chiah a ni a, hre sain he ni hi Swift-i’n a rawt nia sawi a ni.