Box Office-ah Barbarian a hráng

'Barbarian' chu kar tawp liam ta chhunga North American Box Office-a sum lalut tam ber a ni.

Horror film 'Barbarian' hi theatre 2,340-ah chhuah a ni a, $10,543,948 lai lalutin sum lalut tam ber a ni. Georgina Campbell, Bill Skarsgård leh Justin Long-te channa film hi July 22 khan San Diego Comic-Con-ah premiere niin Zirtawpni liam ta khan theatre-a chhuah turin tlangzarh a ni a, sum lengvak tlem lai nang fuhin chart-ah a chung berah a awm.

'Barbarian' hi $mtd 10 vel senga an siam a ni a, film siamna atana senso ang vel chu an hmu chhuak tawh a ni. Sum lalut tam lo mah se film review-tu lam mit erawh a tlung a, mi 99 review aṭangin Rotten Tomatoes-ah chuan rating 7.5/10 lai a hmu a, critics lamin an fak angreng hle.

Pahnihna chu Hindi film, Ranbir Kapoor channa 'Brahmāstra: Part One – Shiva' niin theatre 810 aṭangin $4,543,659 a lalut. Ranbir leh Alia Bhatt channa film hi India ramah erawh a che ṭha hle a, Pathianni chauh pawh khan cheng vbc 38-39 vel lai a lalut a ni. Ram hrang hrang aṭanga a sum lakluh belhkhawm chu $22,982,773 a tling hial.

Film thar dang
Christian drama film 'Lifemark' chu pasarihna a ni ve bawk. 'Fireproof' star Kirk Cameron channa film hian $mtd 2.2 vel sum a lalut a ni.

Medieval (14), After Ever Happy (26), Unfavorable Odds (30), Hockeyland (33), Hold Me Tight (36) leh About Fate (44)-te chu film thar lang an ni bawk a, kar tawp liam ta Box Office Mojo chart-ah film 62 a lang a ni.