Chris MS Dawngkima leh Duhsaki YouTube lamah an êng an tichhuak

‘Tho la êng rawh’ tih hi kum 2014 KṬP Ge­neral Conference-a theme song kha a ni a, KṬP General Conference Hla Buah pawh dah a ni tawh. A hunlaia tichhuak lo a, tuna an tichhuak chauh hi mi tam tak chuan tlai an ti mai thei a, mahse hla ṭha hi chu tlai tak tak a awm lo. A hma aṭanga dah chhuah tum tawh a ni zawk a, harsatna neuh neuh avangin YouTube-ah hian an dah chhuak lawk lo a, tunah an dah dawn ta chauh a ni. Music video-a tihchhuah tura an siamah hian a version dang hretin an siam a, a ngaihnawmin, a nalh viau ang.

Chris MS Dawngkima hi tunge a nih sawi a ngai lo. A zaithiam a, Ṭhazual chart-ah pawh pakhatna luah tlut tlut thei kha a ni. A zaithiam mai bakah musician a ni a, hla eng emaw zat a siam tawh a, KṬP General Conference Hla Buah pawh a hla siam tawhte kan hmu fo. Durtlang nula zaithiam Duhsaki, Youth Icon-a pahnihna ni tawh hi a zaithiamzia sawi hranpa ngai loa kan hriat a ni. Ṭhazual chart-ah pawh kum 2013 khan ‘Aw Lal Pathian’ hla hmangin pakhatna vawi li lai a luah.

‘Tho la êng rawh’ phuahtu, Chris MS Dawngkima chuan ‘He hla hi kum 2014 daih tawha record leh shot tawh a ni a, tihchhuah dan turah buaina neuh neuh kan neih avangin tichhuak loin kan up a ni. Music video siam hi a lo hlui hma khawp a, shooting kan ti thar leh a, chu pawh chu tihchhuah dan turah kan buai deuh avangin kan duh hunah kan tichhuak mai thei lo,” a ti. Chris-a chuan “YouTube-ah channel ka siam a, chutah chuan he hla hi kan tichhuak dawn ta a ni,” a ti. TV lamah an dah dawn lo a, YouTube-ah chauh an dah ang.

He music video hi Laldinpuia Khawlhring produce a ni a, director hi Benjamin Hnamte a ni. Zorinsanga Sailo leh Lalrohlui ten zaiah hian an pui a, backing vocals-ah Crucifers, Ramhlun North hman a ni. Music hi Lal K. Sailo siam a ni.