Record siamtu Taylor Swift

Album thar pawh a la tichhuak lo a, music video thar a tichhuak chauh a, record a rawn siam nghal chur chur mai. Taylor Swift ‘Look what you made me do’ video chu darkar 24 chhunga YouTube-a entu ngah ber a ni a, Psy record a rawn khum.

Swift hla thar ‘Look what you made me do’ video hi YouTube-a dah chhuah a nih aṭanga darkar 24 chhung­in vawi maktaduai 43.2 zet en a ni nghal a, Psy-a’n kum 2013-a ‘Gangnam style’ hmanga record a lo siam tawh, darkar 24 chhunga entu maktaduai 36 chu a rawn khum.

‘Look what you made me do’ video hi a dah chhuah aṭanga darkar 24 chhung khan, minute khatah vawi 30,000 zel en ang a ni a, darkar khat chhung phei chuan vawi maktaduai 3 en ang a ni.

Vevo lamah pawh Taylor Swift hian kum 2015-a Adele-i’n ‘Hello’ hmanga record a lo siam tawh chu a rawn khum a, darkar 24 chhunga entu ngah ber a ni. Spotify-ah pawh darkar 24 chhunga stream nasat ber a ni. Lyric video a tihchhuah pawh kha YouTube-a lyric video dah tawh zingah darkar 24 chhunga stream nasat ber a ni bawk.

'Look what you made me do' music video-ah Taylor Swift hi lunghlua khat bual thlenga a awm lai a lang. He bual thleng hi lunghlu leh lung man to tak taka tihkhah a ni a, heng lung man tamte hlut lam hi USD mtd 10 vel nia sawi a ni! Bual thlenga Taylor Swift zai lang hian sawizui a hlawh hle. Kim Kardashian entirna niin an sawi! Paris-ah Kim Kardashian rawk a nih khan an phuar bet a, bual thlengah an muttir a, khami entirna kha a ni e an ti.