Shanghai-ah Victoria’s Secret Fashion Show

Victoria’s Secret Fa­shion Show chu khawvelin a hlut tial tial a, an huang pawh an zauh deuh deuh zel. Fashion khawvel hmun pawimawhahte he show hi an nghah tawh hnuah kumin chuan khawvela sumdawnna hmunpui lian, Shanghai lamah he show hi buatsaih a ni dawn.

Victoria’s secret lam chuan kumin November thlaa fashion show an buatsaih tur hi Shanghai-ah nghah a ni dawn tih an sawi a, November 28 a nih hmel hle bawk. Kumin hian an model larte an tel kim theih hmel viau a, Hadid unau chu tel tur an ni a, Jenner lam hi an dinhmun sawi chian a la ni chiah lo.

A tir lam chuan Victoria’s Secret Fashion Show hi New York-ah nghah a ni ṭhin a, New York pawna an nghahna hmasa ber chu France-a Cannes khawpui­ah niin, kum 2000 khan a ni. Hemi hnu hian New York City bawkah buatsaih chhunzawm leh a ni a, kum 2004 khan New York City bakah, Miami, Las Vegas leh Los Angeles-ah te neih a ni. Hemi hnua US pawna buatsaih leh hmasak ber chu kum 2014 kha niin, hemi ṭum hian London-ah nghah a ni a, nikum khan Paris, France-ah neih a ni.