Extraction chhunzawmna siam dawn
Netflix movie Extraction producer Joe Russo chu Extraction chhunzawmna siam turin inremna siampui a ni leh tawh a, script a ziah zawh hunah Chris Hemsworth leh director Sam Hargrave-te pawh inremna siampui turin biak an ni leh dawn.
Joe Russo chuan hemi chungchang hi Deadline hrilhin, "Extraction 2 ka ziahna turin inremna kan siam fel tawh a, eng lam nge a nih dawn tih kan ngaihtuah mek a ni," a ti. Extraction 2 hian a film hmasa a chhunzawm dawn nge, a hma lama thil thleng angin kan siam dawn tih erawh kan la tichiang thei lo. A film tawp danah khan thlirtute thinlungah zawhna kan siam a ni, tiin a sawi bawk.
Extraction tihchhuah a nih aṭanga ni 10 velah a part 2 siam a ni dawn tih hi a chiang nghal a, he film buaipuitute hi an phur hle tih a chiang. Netflix original debut sum lalut hnem ber ni mai thei tur Extraction hi thlakhat chhungin chhungkaw maktaduai 90 velin an en hman dawn nia chhut niin, Spenser Confidential kha a khum hneh dawn hle niin Deadline chuan a tarlang.
Netflix film zingah chuan Spenser Confidential kha a hlawhtling hle a, tlangzarh a nih aṭanga thla khat chhungin chhungkaw mtd 85 velin an thlir hman nia chhut niin, 6 Underground kha mtd 83 velin an thlir hman a, Bird Box kha mtd 80 velin an thlir hman bawk.
Extraction hi buaipuitute an hrawl bakah Chris Hemsworth inlan hian a ti hit zual hle a, hripui leng vanga mahni ina khawvel mi tam ber inkhung lai a ni bawk nen, hei hian thlirtu a ngah phah hle.
Russo chuan film eng emaw zata a lo thawhpui tawh Sam Hargrave nen chuan an thawhdun leh theih ngei a beisei thu sawiin, Hemsworth pawh screenplay a hmuhtir hmasak phawt dawn tih a sawi a ni. Thor actor hian a hmain Extraction hi chhunzawmna siam a nih dawn chuan chang leh turin a phur hle dawn tih a lo sawi tawh nghe nghe.