Crorepati-a tel tur digital-in thlang dawn

Covid-19 hri leng vangin a vawi khatna atan Kaun Banega Crorepati (KBC)-a tel thei tur chu digital-in thlan a ni dawn tih Sony Entertainment Television chuan a tarlang.

May 9 - 22 inkar hian KBC-a tel tumte tan registration a tih theih dawn a, hemi inkar hian he reality show host tur Bollywood actor Amitabh Bachchan chuan tel tumte hnenah zantin zawhna pakhat zel a zawt dawn a ni.

Zawhna chhangtute hian an chhanna hi SMS-in emaw SonyLIV app-ah emaw an thehlut thei ang. Registration ti zinga an thlan chhhuahte hi screening an nei leh dawn a, hemi paltlangte hi online audition neih pui an ni dawn a, chu mi hnuah online-in personal interview neihpui leh an ni ang.

Kum dang ang lo takin kumina Crorepati-a tel thei turte hi digital hmang veka thlanchhuah an ni dawn a ni. Crorepati hi kum 2000 aṭang khan neih ṭan a ni a, kumina neih tur hi season 12-na a ni. Season 9, 10 leh 11-ah khan zawhna 16 belh a ni. Zawhna chhang dik vek hnenah hian lawm man atan Rs vaibelchhe 7 thleng hlawh theih a ni tawh bawk.