Mizo Idol Top 5 inelna zo Result kan nghak
Mizo Idol Season 7 chu ni 57 chhung neih a ni tawh a, show hmabak zan thum chauh a awm tawh. September 13, Thawhlehni zan khan Dawrpui Multipurpose Centre-ah top 5 inelna zan hnihna neih a ni a, beng leh mit a tlai leh pek hle.
Inelna ṭan hmain Idol Season 6-a mi Peter Lalnunpuia, Jonathan Lalengzauva leh Lalduhawmi (Awmawmi) te an inlan a, kum li liam ta ang thoin an la zai thiam reng. Awmawmi zai lai hian Mizo nula leh tlangvalin chheih lam an entir a, hmuhnawm a tling.
Tun ṭum idol-a tel tla tawh Judith Lalnunsangi, Angela Malsawmpari leh Lalnunpuii te an inlan bawk. Angel-i hian ama hla phuah ngat a rawn a sa a, mipui lawm a hlawh hle.
Inelna chu
Hmangaihi a rawn zai hmasa bera Lalnunmawia (Valtea) hla 'Thinlai, kimte'n dawn la' tih a rawn sa. Judge Vari chuan, "Ka tum lo deuh i sa, i ta neih loh deuh," a tih laiin judge Robin-a chuan, "I ta ngawih ngawih angin i rawn sa. Zan dang zawng aiin i pitch a ṭha zual," a ti thung.
Angaihi'n TBC Zaithanpuia hla 'Ka inngahna' a rawn sa zui a, a sak chhan hi hla a muan vang leh a nuna thu a sawi vang a ni. Judge pathumten an fak vek.
VL-i a rawn inlar ve leh a, Rev. Lalvensanga phuah Lalpa i fak ang tih chu a rawn sa. Judge Vari chuan, "A tir aṭanga a tawp thlengin a hahthlak. Ka lo ṭang lutuk. Ropui deuhin i ṭan a, ropui takin i tawp," tiin a fak. Judge Robin-a erawhin 'climax' lai awm lai chu pawi a tih thu a sawi thung.
Palinaah David-a a rawn chhuak a, Darţhuama phuah 'Phu loh lengi' a rawn sa. Vari chuan, "Hemi hla ka ngaihthlak tawhah chuan i la sa ṭha berin ka hria," ti hialin a fak a, house band-te a fak bawk.
Deborah-i'n a tawp a rawn khar a, V Thangzama hla phuah Ka Di Chhawrthlapui chu ngaihthlak nuam takin a rawn sa. Judge Vari chuan, "Idol hi Lunglei lama hawn thleng tur hian tuna i tih dan pet pet hian a thei ang em?," tiin zawhna a zawt a, a chhan hmain judge Rinzauva Sailo chuan, "Thei ang ti tlat rawh," tiin a lo chhansak.
Mizo Idol top 7-ah contestant-te an zai ṭha tlang a, September 16, Zirtawpni zanah result puan a ni dawn. Mizo mipuiten tling tur an inrinsiak a, rin thiam a har - ring dik vek awm tak maw!
Idol ṭhat ber ṭum a ni - Rinzauva Sailo
Mizo Idol bul ṭan tirh aṭanga buaipuitu Rinzauva Sailo chuan Mizo Idol Season 7 chu Mizo Idol awm tawha ṭha bera a ngaih thu a sawi. Ani hi season 1 aṭanga buaipuitu niin season 3 aṭangin judge a ni ṭan.
Rinzauva Sailo chuan, "Kumin Idol hi kum dang zawng aiin stage bakah light leh sound-te a ṭha zawk a, a ropui zawk. Contestant-te pawh hi a nawlpuia lakin an ṭhat ber ṭum niin ka hria. "Ṭum dangah chuan top 10 chinah beat and bar-a buaina neite an awm leh ṭhin a, kuminah chuan contestant-ten music basic an hre ṭha em em a ni," tiin Vanglaini a hrilh a, top 3 tur thlan pawh a harsat tur thu a sawi tel bawk.
Zaithiamte kawm an nuam - Angelina Paul
Mizo Idol host Angelina Paul chuan contestant-te chu kawm an nuam a, anmahni pawh an inkawmngheih hlawm thu a sawi. Angelina chuan, "Idol ṭantirh aṭang khan contestant-te hi kawm an nuam hlawm a, mipui hmaah inel ṭhin bawk mah se back stage lamah chuan kan nui ho nasa ṭhin hle. An vai hian Mizo Idol ni thei se ka duh a, a theih si loh. Tel ve lo mah ila, top 5 result puan pawh a huphurhawm khawp mai," tiin Vanglaini a hrilh.
