Zaninah Mi pahnih thlah ngai dawn

Mizo Idol season 7 hmawr bawk hun a hnai zel a, zanin hian Top 3-a tlingte puanna neih a ni dawn a, tling zo lo pahnih thlah liam an ngai dawn.

Kar leh lam aṭang chuan mi pathum chiah an intihsiak tawh dawn tihna a ni a, mi 400 chuang aṭanga a thiam zual pathum thlan chhuahte chu karleh Thawhlehni zanah hian a zan khatna atan an intihihsiak leh dawn a ni.

Zanin chhiar telin Mizo Idol show hi zan thum chiah kalpui a ni tawh dawn a, kar leh Zirtawpni zanah chuan a hmar an bawk fel tawh dawn a, tunge Mizo Idol tih kan hre tawh ang.

Tla tur/tling tur hriatthiam a har

Kan hria a, David Lalchawisanga Darlong, Deborah VL Hmangaihi, H Vanlalhmangaihi, C Vanlalroluahtumi leh Lalngaihzuali-te chu top 5-a inhlangkaite an ni a; an tu pawh tlingin emaw tla emaw se, thlirtu lam chuan mak an tiin a rinawm loh. An thiam em em vek a, an panga hian zan hnih an intihsiak a, an thiam zia chu mipui lamin kan hriat tawh kha.

Lalngaihzuali leh C Vanlalroluahtumi-te chu Top 5-a Gospel singer la tlingte an ni a, midang pathumte hi lengzem hla satu ni thungin an vai mai hian intihsiak an hmachhawn zan hnihnaah an zai a mawi a, langsarin an chesual lo vek bawk. Judge-te lu a hai hle ang tih pawh a rin thiam theih.

Zanin hian kan ṭan zawng takte pawh an tla thei - zai intihsiak a ni miau a, thiam tih zawng a inang thei lo a, kan duhte hi midangin an lo duh ve kher lo a, kan ṭan em avanga tla thiang lo pawh an awm lo - Judge Rinzauva Sailo sawi angin, "Thiam eng ang pawh ni ula pahnih chu in tlak tho tho a ngai dawn," a tih angin zai thiam pahnih chu zanin hian kan thlah dawn a ni.

Result puan + Show

Zanin hian intihsiakna a awm dawn loa, result puan bak chu show tawp a ni dawn. Guest artist an awm dawn lo a, mahse Top 10-a tlingte erawh an inlan leh vek dawn. Top 10-a kan ṭan zawng tak kan thlah liam takte khan zanin hian stage an rawn mawi leh dawn a ni.