Inter College Quiz Competition 2022 a zo ta ; Hrangbana College an thiam ber

Mizo Students’ Union (MSU) buatsaih ‘UPSC Challenge Inter College Quiz Competition 2022’ Final chu Nilaini zan dar 8 khan Ignite Studio, Khatla-ah neih niin, Govt Hrangbana College an champion.

Final ah hian Govt Hrangbana College leh Govt Saiha College an intum a, Round 5 thleng intihsiakna neih a nih hnuin, Govt Hrangbana College hian point 80 hmuin, point 55 hmutu Govt Saiha College hnehin pakhatna an ni ta a ni. Pakhatna hian lawmman Rs 50,000 an dawng.

Intihsiaknaah hian Participants bikte tan zawhna 533 awmin, heng zingah hian zawhna 189, 35.5% chhan dik a ni.

Intihsiakna neih chhung hian Andy L Khobung, 5th Semester, Govt Hrangbana College chuan zawhna 20 lai chhang dikin Quiz participant-te zinga tiṭha ber, ‘Best Quizzee’ lawmman a dawng.

Inter College Quiz Competition-ah hian Mizoram chhunga college hrang hrang 22 - Aizawl khawchhung aṭangin 11 leh Aizawl khaw pawn aṭangin 11 an tel. Zawhnate hi UPSC syllabus behchhana siam vek an ni.

He inelna hi Miss Mizoram 2020-a pahnihna Zomuanpuii Fanai chuan zei takin a kaihruai a ni.