Harry Styles leh Bad Bunny bawk

Harry Styles single hit tak mai 'As It Was' leh Bad Bunny album 'Un Verano Sin Ti'-te chuan Billboard Hot 100 leh 200 chart chung bera awm nuam an ti laklawh a, an chhuahsan hleithei lo. Kar khat vel han chhuahsan zawk ṭhin mah se kar a liam a, a chung berah bawk an rawn ding leh mai ṭhin zawng a nih hi!

Billboard Hot 100 chart-ah Harry Styles 'As It Was' bawk pakhatna a ni leh a, kar hmasa lamah pawh khan pakhatna ni tawhin kar 13 (a zawn ni loin) lai chu Hot 100 topper a ni tawh. He chart-ah hian kar 23 lai a cham tawh bawk.

Hot 100 chart-ah hian hla thar rawn invawrh hluai a awm lo rei tawh a, top 10-a lang ho pawh a ngai te te bawk an ni hlawm. Steve Lacy 'Bad Habit' pawh kar hmasaa a dinhmun pahnihnaah a ding leh a, Harry Styles hla tho 'Late Night Talking' chu 12-na aṭangin pathumnaah a rawn invawrh ve bawk a ni.

Billboard 200 chart-ah chuan

Bad Bunny album 'Un Verano Sin Ti' bawk pakhatna ni lehin kar 10 lai Billboard 200 chart No.1 a ni ta. Kar 18 chhung he chart-ah hian cham tawhin a hun tam ber chu pakhatnaah hian a hmang a, pakhatna a nih loh ṭum pawhin top 3 dinhmun a chhuahsan thei meuh lo.

Kar hmasa lama pakhatna DJ Khaled 'God Did' chu palinaah a tla thla a, Morgan Wallen-a album hit tak mai 'Dangerous: The Double Album' chu pahnihnaah a rawn invawrh leh. He album hi chart-ah kar 87 tehmeuh a lang tawh a ni.

Megadeth chuan an album thar 'The Sick, The Dying... And The Dead!' chu palina an nihpui a, Harry Styles chuan 'Harry's House' hmangin top 5 a khar thung.

Artist 100 chart lamah pawh Bad Bunny hi pakhatna a ni a, Harry Styles chu pahnihna niin Megadeth chu pathumna an ni ve bawk.