Top 3 : David, Hmangaihi, Roluahtumi ; Fans ngah Deborah-i leh Zuali kan thlah a ngai ta

Mizo Idol Top 5 result nizan khan puan a ni ta a, David Lalchawisanga Darlong, H Vanlalhmangaihi leh C Vanlalroluahtumi-te chu Top 3-ah inhlangkaiin Deborah VL Hmangaihi leh Lalngaihzuali-te erawh Mizo Idol aṭangin ui takin thlah an ngai ta thung.

Top 5 intihsiakah khan
Davida, Hmangaihi, Vli, Deborah leh Zuali-te hi zan hnih an inel a, chuta ṭang chuan endiktute'n thutlukna an siam,

Davida hian 'I tel lo chuan' leh 'Phu loh lengi' chu sain Top 3 a inhlankaipui a, ani hi a che chhe thut a nih loh chuan Mizo Idol hial ni tur pawha dinhmun ṭha sa a ni.

Hmangaihi chuan 'Hmangaihna ka ngen a ni' tih hla hmanga mipui a barakhaih hnuah 'Thinlai, kimte'n dawn la' chu zan hnihnaah a sa leh a, Top 3-ah chung hla pahnih hmang chuan a inhlangkai.

Top 3-a Gospel singer la tling awmchhun Roluahtumi chuan 'Pathian hmangaihna ropuizia' hmangin a vocal range zau zia a pholan hnuah 'Lalpa i fak ang' a sa leh a, heng hla pahnihte hi a la tlinpui ve bawk.

Fans ngah leh mi tam takin an duhrawh Deborah VL Hmangaihi chuan 'Ka hmangaih che a sin' leh 'Ka Di Chhawrthlapui' chu top 5 intihsiaknaah sain, Top 3 a thleng zo ta lo a ni. Endiktu lamin 'skills' nei ṭha an tih Lalngaihzuali pawhin 'Pathian ropui rawh se' leh 'Ka inngahna' chu Top 5-ah a rawn dinchhuahpui a, mahse inelna sang zawk erawh a thleng zo ta lo a ni.

Chutichuan...
Davida, Hmangaihi leh Vli-te hi Thawhlehni zan hian a zan khatna atan an inel leh ang a, September 23, Zirtawpni hian a zan hnihna atan an inel leh bawk ang. Chuta point hmu sang ber chu Mizo Idol-ah puan an ni tawh dawn a ni. Top 3 aṭang hian Mizo Idol tur thlan a ni tawp tawh dawn a, Zirtawpni zan, Grand Finale-ah hian Mizo Idol hi an puang nghal dawn a ni.

Deborah-i leh Zuali kan mangṭha a ngai ta
Deborah-i zai thiam zia leh 'special' zia chu sawi nawn ngai loin Mizo Idol en ṭhinte'n an hria. A tla ta pawh hi mi tam takin an ui dawn tih a chiang. Mahse, judge-te sawi angin Mizoram rimawi khawvelah erawh contestant zinga hmabak nei eng ber pawl a ni a, a fan-te'n a zai an la ngaithla kham lo a, rimawi khawvel a luhchilh zel a nih ngat chuan a 'hit' chhunzawm a rinawm.

Lalngaihzuali 'skills' hi a sang a, a aw a lian ṭha bawk a, a sak awm tak hla a thlang fuh chho zel a nih chuan a hmabak a eng khawp ang. Mi 400 chuang zinga a ṭhazual panga thlan chhuah zinga tel thei a ni a, rimawi khawvelah kan hmuh chhunzawm zel beisei ang. Gospel singer thar ṭha tak Zofate'n kan nei, ti ila kan sawi sual awm lo e.