Top 10-te'n show hmuhnawm leh ngaihnawm min hlui
Zirtawpni liam ta zan khan Mizo Idol Top 10-te chuan show hmuhnawm leh beng titlai tak thlirtute an hlui a, show neih zawhah Top 3-a tlingte an puang nghal a, Deborah VL Hmangaihi leh Lalngaihzuali-te chu Mizo Idol Season 7 intihsiakna aṭangin kan mangṭha a ngai ta a ni.
Mizo Idol 2022 Top 3-a tlingte puan zan khan show manhla tak mipuite min hlui a, contestant-te an zai thiam zia min hriatnawn tir leh a ni. Angaihi leh David-a te'n Mizo Idol hmasa bera an theme song, Zorock-a hla 'Zoram ngaih hla' hmangin show an hawng. Zoram pawnlam aṭanga show thlirtute lung tileng vawng vawng tur khawpin an zai a mawi.
Eddie, Jeffrey, Vli leh Hmangaihi-te'n 'Kha mah mah' hmangin an rawn chhunzawm leh a, chumi hnuah Pca, Ngaihsaka, Deborah leh Chhanteii-te'n 'LBS' an rawn ti ve leh bawk. 'Lo buai suh' han ti viau mah se an zai a mawi lutuka 'buai loh a har'. Mizo Idol Top 10-te hian an hla duhzawng ṭheuh 'pressure' awm miah loin an sa bawk.
Angaihi leh Deborah-i-te'n tlak dan an thiam a, show tawpa an duhzawng sawina hun an pekah pawh an ṭawngkam hriat a nuam hle.
Vanglaini chuan Angaihi leh Deborah-te chu biain Top 3 an inhlangkai zo lo chu an la na hran lo tih sawiin an tana ṭha zawk tur nia an hriat thu an sawi ve ve. Rimawi lam erawh tawpsan an tum lo ve ve a, rimawi khawvel lamah an sulhnu kan la hmu chho zel dawn niin a lang.
Top 3-te hmalam hun
Hmangaihi, David-a leh Vli-te chu Top 3-ah inhlangkaiin Thawhlehni zan hian intihsiakna an nei leh dawn a, Zirtawpni lo awm tur zan hi Grand Finale hun a ni tawh dawn a, hemi zanah pawh hian an intihsiak leh anga, Mizo Idol puan a ni nghal bawk ang.
Judge-ten Angaihi leh Deborah chungchangah eng nge an sawi?
Robin-a chuan Angaihi chuan thurawn a zawm ṭhat thu leh a ṭhat tulh tulh thu a sawi. Vari chuan a tira a zai leh Zirtawpni zana a zai chu a inthlau tawh hle tih a sawi ve bawk. Azautea pawhin Idol stage tihlutu a nih thu 'run' leh 'riff' uartu a nih thu a sawi bakah hmasawnna tur a la neih thu a sawi.
Deborah-i pawh an fak hle a, Idol ber ni lo mah la Zoram khawvelah hian nangmah duhtu hi an tam ber ka ring tiin Robina chuan a sawi hial. Vari chuan Deborah-i chu a kum ngaihtuahin a puitling hle tih sawi ve bawkin ze nghet tak nei a nih thu a sawi. Azautea chuan elimination-a a zai a ngaihthlak hnuah Aizawl lama a zai ngaihthlak hlan a lo nghahhlelh thu sawiin 'market set' sa a nih thu a sawi a ni.
"Project hmachhawp em em ka nei hran lo. Mahse October 15 hi chuan Mualchin Cafe, Zotlang, Lunglei lama gig nei tur chuan kan inbe lawk deuh tawh a, chu chu a ni deuh mai. "Hla pahnih vel chu recording ka nei mai thei. Zirna chhunzawm pahin rimawi lam pawh ka buaipui tho ang" - Deborah
"A la chawpchilh angreng bawk nen, project hmachhawp han sawi mai tur ka hre rih lo. Mahse ka hla sak hnuhnung ber kha chu musician-te nen kha chuan recording tihte chu kan sawi deuh tho. "Music lam chu luhchilh chhoh zel ka tum a, Gospel lam sak chhoh char char rih ka tum bawk," - Angaihi
ZONUNI THUKHAWCHANG
Endiktute'n thuthlukna dik leh ṭha an siam tur phenah hian thil nihphing kil hrang hrang aṭanga thlir hnuah pawh hmuh dan inbuk tawk taka rem khawm thiam ala ngai fo ṭhin a, mi za rual zet aṭangin mi pathum a ṭha filawr thlan chhuah an ni ta hi thil awlai lo tak a ni, endiktute thawhrimna leh taimakna ka fak thlawt!
Tlinga kan puan hmasak ber T Vanlalhmangaihi hi kan han awmho tam takah chuan a kum leh pumrua anga en chi a ni miah lo tih ka hmu a. A ze puitlang tak te, a tumruhnate, a ṭhian; a inelpuite a duhsakna leh a hmangaihnate hi ka hmuh hmaih thei loh te zinga mi a ni.
Top 3 a kan tlangval neih chhun David Lalchawisanga Darlong hi a bul a awm a va nuam tehreng em! Hla zirna hmunah te, show zanahte contestant-te'n a hming an lam rik tam ber a ni ang.
Inelna kan neih tirh aṭang tawha a hming leh hmel hrechiang lo pawh khan Saichal nula an lo tih luai luai kha a àwm hle mai, Top 3-ah kan hmu ta. He idol aṭang hian Ṭingṭang Kawn a lar hle, amah Vli vang liau liau a ni, hetiang a mahni khua leh veng chawimawi thei nula hi fakawm ka ti a, ṭawngkam tharte zirin kan han fiamthupui lawp lawp ṭhin a, boruak tizangkhaitu pakhat a ni.