Zaninah Top 3 intihsiak zan khatna ; Mizo Girl Group thar an inlan dawn!

Mizo Idol season 7 Top 3-te chu zanin hian a zan khatna atan an intihsiak dawn a, Mizo Idol Season 6-a thlengsang tak Teawmi leh pahnihna Mami Hnamte-te an inlan dawn bakah Mizo Girl group thar IVY'Z-te an inlan dawn.

David Lalchawisanga Darlong, H Vanlalhmangaihi leh C Vanlalroluahtumi te chu zanin aṭang hian an inel ṭan leh dawn a, zan hnih an inel leh dawn a ni. Mi 400 chuang aṭangin anni pathum chiah hi intihsiakna hmachhawn thei an ni tawh a, an theuneu lo tih a chiang. Inelna boruak pawh a sang tawh a, an zai thiam tawh hlawm bawk si a, contestant-te pawhin Mizo Idol meuh ni tur chuan fimkhur tak chunga risk an lak a ngai tawh dawn a ni.

Zanin hian an hla sak tawh sa aṭangin an hla duh ber an sa leh thei dawn a, chubakah chuan an la sak ngai loh hla thar dang an sak a ngai dawn bawk. Inbuatsaih hun an ngah lo zia hrechiangtu chu thlirtu mipuite an ni awm e. Chutichung chuan ṭha takin, chetsual pawh nei mang loin an rawn inlan ṭhin. Mizo Idol contestant-te an 'professional' hle tih pawh hei hian a tilang chiang a ni.

Zirtawpni zan hian a zan hnihna atan an intihsiak leh dawn bawk a, hemi zanah hian Mizo Idol puanna pawh neih a ni nghal tawh dawn. Mizo Idol 2022 show hmawr bawkna turin kat khat pawh a awm tawh loa, intihsiak zan phei chu zan hnih chiah a ni tawh. Tuna la tling mi pathumte hi chet sual nei duh lo ṭhiau an ni a, judge-te rilru hneh tura risk la huai tak takte an ni hlawm tawh bawk. Chuvang chuan an zai ngaithlak hlan a nghahhlelhawm tawh viau mai.

Teawmi leh Mami-te zai kan ngaithla dawn
Immanuel Lallawmpuii, Teawmi hi Mizo Idol 2018-ah khan Top 4 thlengin an hunlai chuan boruak nei lian ber zinga mi a ni. Zaninah Mizo Idol stage-ah a rawn inlan leh dawn a, a nghahhlelhawm tawh hle.

H Lalnunsiami, Mami hi Mizo Idol season 6-ah khan pahnihna a ni. 'Soul' lamhawi sa ṭhinin a che ṭha tluan ṭhak a, final-ah Jerry-a tluk zo ta lo a nih kha. Zirna lam a chhunzawm avangin rimawi khawvelah kan hmu zui lutuk loa, zanin hian a zai mawi tak kan ngaithla leh thei dawn a ni.

IVY'Z ve thung
Zonet-in a buatsaih Girl Group Survival show-a girl group tura thlan chhuah mi palite kha an ni. Hlimpuii, Saii, Vashti leh Juchi-te an ni a, Girl Group Survival show en ṭhinte tan chuan mi thar an ni lo. An zai thiam bakah an lam thiam tel a, talent an nei ṭha bawk nen, stage lian taka an han chevel tur pawh hi a hmuhnawm dawn a, show tihlutu an ni dawn chiang a, mit leh beng titlaitu an ni dawn.