Dua Lipa: Album pathumna tur siamna kawngah a zalen

Dua Lipa chuan a album pathumna tur a buaipui mekna kawngah a zalen hle tih a sawi a, chutiang chuan a la awm ngai lo tih a sawi bawk.

Vogue Australia-in an kawmnaah hemi chungchang hi sawi chhuakin,"Ka album thar tura hlate ka ziak mek a, kawng danglam tak maiin ka zalen zawk a ni. Ka rin aiin keimah pawh thuneihna ka nei zawk niin ka hria," a ti. Zalenna a sawi chungchang an zawh chianna chhangin,"Hmeichhe tan hi chuan, mahni kut ngeia thil tih theih leh mahni duhzawnga thuneihna chungchang a ni," tiin a sawi a ni.

Kum 27 mi 'Levitating' hitmaker chuan kum 2020-a a tihchhuah 'Future Nostalgia' chhunzawmna tur album a buaipui mek chu a record hmasate aiin a puitling zawk hle tih a sawi a, amah ngei pawh kawng hrang hrangah a puitling tawh zawk tih a sawi.

Dua Lipa hian thla hnih liam ta vel lawk kha chuan a album thar tur chu naute ang mai a la nih thu a sawi a, a hmanhmawh lo tih pawh a sawi tawh bawk a ni. Mahse tunah chuan a 'title' tur pawh a thlangfel tawh tih a sawi lang a, album tihchhuah leh erawh a hmanhmawh hran loh thu a sawi thung.