K. Lalrintluanga Idol hnuah music video a tichhuak ve ta
Tluanga tan ‘Sawmna aw mawi’ hi kum 2013 Mizo Idol hnua a solo music video hmasa ber a ni a, kum li zet hnuah a music video hi kan hmu ve chauh a nih chu. Mizo Idol hnua music video-a a lanna hmasa ber chu kum 2015 khan Omomi nen “Krista ka lungpui nghet’ an rawn tichhuak. Hemi hnu hian Tluanga hi kan hmu zui lo a, kuminah kan hmu ta a ni.
Music video lam a khât viau a, Tluanga chuan, “Music video han siamzui kha keimahah a lang vak lo a, chubakah hna lama ka buai avang te, Pathian rawngbawlna lama theihtawp ka chhuah avangtein ka duh angin ka chhu zui thei lo. Chu bakah ka duh ang tak hla ka hmu thei lo a, bul han ṭan hi a harsa duh khawp mai,” a ti. ‘Sawmna aw mawi’ hi a duh ang tak a ni ta a, music video a rawn siam ta a ni. “Ka lungthlukna zan a ni a, chu bakah a hla hi sawmna lam a ni bawk a, min hneh hle a ni,” a ti.
‘Sawmna aw mawi’ hla phuahtu hi Henry Hmuaka a ni a, recording hi Blue Waves-a a tih niin, video hi SVP kutchhuak a ni. “Music video ka siamnaa min pui a, a puitlin theih nana tha thawhtute zawng zawng chungah ka lawm em em a ni,” a ti. A video-ah hian a hla thu mil turin KṬP Ramhlun Vengchhak Matthaia Group te an chang bawk a, hei hian a music video a tihmuhnawmin a hla thu nen rilru a hneh lehzual.
Music khawvelah reh rei mah se Tluanga hian reh vang vang erawh a tum tawh chiah lo a niang, “Krismas hla siamte ka rilruk deuh,” a ti. “Krismas hla music video siam ka duh deuh, ka tihlawhtling thei ta lo a nih pawhin kumthar lamah chuan hma ka la leh ang. Kumin chuan Krismas hla ka tichhuak lo a nih chuan hla dang buaipui ka tum rih lo,” a ti.