Hot 100-ah Swift a pakhatna dawn chiang ; Mariah Carey fan-ten Swift an lawmpui

Taylor Swift hla thar ‘Look What You Made Me Do’ hi a tihchhuah aṭanga chawlh­kar khatnaah vawi nuai li an download tling tawh a, kumin chhunga chawlhkar khat chhunga download hnem ber record lo siam­tu Ed Sheeran a rawn lehpel daih tawh. Ed Sheeran hla ‘Shape of you’ kha download ngawr ngawrah, kumin chhungin chawlhkar khat chhunga download hnem ber a ni ṭhin a, vawi 240,000 download a ni.

Streaming lamah pawh a turu hle. Kumin chhunga chawlhkar khat chhunga an stream nasat ber chu Luis Fonsi, Daddy Yankee leh Justin Bieber-te hla ‘Despacito’ kha a ni a, kar khat chhungin June thla khan vawi maktaduai 69.6 stream a ni. Taylor Swift hla thar hi vawi maktaduai 60 an stream tawh a, an la pun belh zel. Streaming-a hmeichhe zaithiam zinga record lo siamtu tawhtu chu Adele hla ‘Hello’ kha a ni a, kar khat chhungin vawi maktaduai 61.6 stream a ni a (kum 2015 Nov.), kha kha a khum thei reng tawh a ni.

Swift vangin Mariah Carey fans an lawm
Taylor Swift hla thar a rawn hlawhtlin chhoh avangin Mariah Carey fan-te chu Taylor Swift chungah an lawm hle a, Taylor Swift hi an ṭan hle.

Mariah Carey fan-te an lawmna chhan chu ‘Despacito’ hlain ro a relna hi Taylor Swift hian a rawn phet thla thei dawna an hriat vang a ni. Billboard Hot 100 chart-a pakhatna luah rei ber chu Mariah Carey leh Boyz II Men te hla, kum 1995-a mi kha a ni a, a zawnina pakhatnaah vawi 16 a awm. Luis Fonsi, Daddy Yankee leh Justin Bieber-a te hla ‘Despacito’ a rawn lian a, Mariah Carey te hi a zawna pakhatna luah ngunah a rawn nih rual ta mai. Mariah Carey fan-te chuan ‘Despacito’ hian a lehpel mai ang tih an hlauh zek zek laiin, Taylor Swift a rawn lang ta a, an thaw huai ngei ang.

Mariah Carey fan-te hi an ṭang hle a, Twitter velah pawh Taylor Swift hla chu download tur te, stream vak vak turtein an infuih a, an post darh nasa hle!