VS Fashion Show ; Kendall Jenner a tel dawn lo

Kumin Victoria’s Secret Fashion Show-ah Kendall Jenner a tel dawn lo tih sawi a ni a, kum 21 mi model lang ve lo tur hian ngaihven a hlawh hle. Kumin hian Shanghai, China-ah he show hi neih a ni ang.

Kendall Jenner lan loh tur chhan an sawiah chuan Kendall hi Victoria’s Secret elpui ber mai, La Perla nen inzawmna an nei a, he mite hian VS show-a tel lo tur hian an nawr a ni. TMZ-in a tarlan dan chuan La Perla leh Kendall Jenner te hian dollar maktaduai chuang hu inremna an siam a, Kendall hi he La Perla brand campaign-a a hmatawngtu ber a ni. Social media pâwn lamah Kendall hian La Perla kutchhuak hi a tilar viau tawh reng a, kumina Met Gala-ah pawh khan La Perla gown a inbel nghe nghe.

September 8-a New York Fashion Week-ah Kendall Jenner hi Fashion Icon of the Decade chawimawina pek a ni dawn. He chawimawina a dawn tur pawh hi sawiselna a tam mai. Mi tam tak chuan he chawimawina dawng tur hian a la naupang lutuk an ti. NYFW hi Ashley Graham chuan a host dawn a, Mario Testino chu Creative of the Year lawmman pek a ni ang a, Jordan Barrett chu Male Model of the Year chawimawina pek a ni bawk ang. Lena Dunham leh Jenni Konner ten Best Digital Destination award an dawng dawn a ni.