Priscilla Fanai hla phuah Lawmkimi'n video-in siam

Zaithiam Priscilla Fanai hian hla phuah a lo thiam tih i hre lo mai thei, mahse Lawmkimi Ralte music video thar i en a, i ngaihthlak chuan Priscilla hian hla phuah a thiam a ni tih i hria ang. YouTube-a a video dahte pawh thlir hlawh Lawmkimi Ralte chuan Priscilla Fanai hla, 'Min siamthar leh ang che' tih chu music video siamin a tichhuak leh ta.

'Ka hnenah chauh' tih aṭanga kan hriat lar Lawmkimi Ralte hla 'Min siamthar leh ang che' hi Priscilla Fanai hla phuah a ni a, a thluk hi Otto band guitarist ṭhin, C. Lalhmuaka siam a ni. Video hi Chiangtea kutchhuak a ni a, AWR Studio-ah music hi siam a ni a, he hmunah hian an record nghal bawk.

Lawmkimi Ralte music video-te hian thlir a hlawh hlawm hle. 'Kei aia hmangaih tu che an awm lo' tih chu YouTube-ah entu nuai 1 leh sing 4 chuang a nei tawh a, a hla hit, 'Ka hnen­ah chauh' pawh kha nuai khat tling hnai tawh hle. B.Sc (Nursing) zir ṭan mek Lawmkimi Ralte hian a zirna a chhunzawm leh thuai dawn a, a zirna chhunzawm leh hma ngeiin music video thar min hnutchhiah a ni.