'The Woman King' a lal ber

American historical epic film 'The Woman King' chuan kar tawp liam ta khan North America Box Office-ah sum a lalut tam ber a, theatre 3,765 aṭangin $19,051,442 lai sum a lalut.

'The Woman King' hi $maktduai 50 vel senga an siam niin ram dangah an la tlangzarh lo thung a, September 9 khan Toronto International Film Festival-ah erawh premiere a ni hmasa thung. Cirtics lamin he film hi an fak angreng hle a, a bik takin a changtute chevelin fak a hlawh a, Davis chetla vel chu fak zualin action chereography pawh an fak hle.

Viola Davis, Thuso Mbedu, Lashana Lynch, Sheila Atim leh John Boyega-te channa film hi Rotten Tomatoes-ah film review-tu 141 zet aṭangin rating 7.7/10 lai a hmu a, hei hian film hmuhnawm tak a ni tih chu a tichiang awm e.

Top 10-a film thar dangte chu...
Mia Goth channa film 'Pearl' pawh Zirtawpni liam ta khan tlangzarh niin $mtd 1 vel lek senga an siam film hian $mtd 3.1 a lalut a, pathumna a ni. He film budget sang lo tak hi mi 103 laiin Rotten Tomatoes-ah an review tho a, rating pawh a hmu ṭha- 7.5/10 lai a hmu.

Palina pawh film thar bawk niin mystery comdey film 'See How They Run' a ni. Sam Rockwell, Saoirse Ronan, Adrien Brody, Ruth Wilson, Reece Shearsmith, Harris Dickinson, leh David Oyelowo-te channa film hi $mtd 3 vel chu theatre 2,4040 aṭangin a lalut.

'Moonage Daydream' chu film tlangzarh thar zinga top 10-a lang ni bawkin 10-na a ni.

Film thar a awm nual
Box Office Mojo chart-ah film 63 lai tarlan a ni ta a, boruak a ziaawm chho zel a, chart-a lang film pawh a tam chho tawh khawp mai. Film 63 aṭanga film 14 lai chu film tlangzarh thar a ni a, Box Office-a sum lengvak pawh a tam chho zel a ni.