‘Constantine’ chhunzawmnaah Keanu Reeves lo kir leh dawn

Kum 2005-a tihchhuah, Keanu Reeves-a channa DC Comic film ‘Constantine’ chu a chhunzawmna an buaipui ṭan leh mek a, Keanu Reeves bawk a chang leh dawn niin an sawi.

Keanu Reeves mai bakah hian film hmasa director Francis Lawrence bawkin a direct leh dawn niin an sawi bawk a, an project buaipui mek hi a hlawhtling a nih ngat chuan film hmasa an tihchhuah aṭanga kum 17 chuang a liam hnuah a chhunzawmna an tichhuak ve leh dawn tihna a ni.

Supernatural exorcist John Constantine lemah hian 'The Matrix' star Keanu Reeves hi hnehsawh takin a chang a, Box Office lamah pawh a hlawhtling hle a nih kha. Variety chuan Warner Bros. hian a chhunzawmna an siam leh dawn tih hi an tichiang tawh niin an tarlang.

John Constantine hi DC Comics Swamp Thing #37 (June 1985) khan lang hmasa berin Alan Moore, Stephen R. Bissette, Rick Veitch, leh John Totleben-te character siam a ni. Kum 1988 khan ama pual comic an tichhuak ṭan a, comic leh animated movie ṭhenkhatah chuan Justice League member-ahte pawh a tel ve nghe nghe a ni.