Metallica-in Helping Hands Concert buatsaih leh dawn

Heavy Metal band chuai thei lo Metallica chuan a kum thumna turin Helping Hands benefit concert an buatsaih leh dawn tih Thawhṭanni khan an puangzar.

An 'All Within My Hands foundation' kaltlangin he concert hi an buatsaih dawn a, concert bakah hian Auction pawh an nei nghal dawn a, a vawi khatna atan Southern California lamah he concert leh auction hi an nei dawn bawk. December 16 hian an nei dawn tih an puangzar a, L.A. Microsoft Theater-ah artist dang hming an la puanzar lohte nen concert hi an nei ang.

Helping Hands Concert aṭanga an sum hmuh zawng zawng hi Metallica non-profit organization, 'All Within My Hands foundation' kutah an pe vek dawn a, chumi hmang chuan mi harsa zawk leh ṭanpui ngaite ṭanpui an ni dawn.

November 2020 khan Helping Hands Concert and Auction hnuhnung ber chu neiin $maktaduai 1.8 lai an hmu chhuak a, an sum hmuh chhuah chu Feeding America, American Association of Community Colleges leh Covid-19 vanga harsatna tawkte hnenah an pe a ni.