Thawhlehnaniropuia Music video thar a tichhuak

Mizo Idol 2015 aṭanga Zoram khawvelin kan hriatlar, Thawhlehnaniropuia chuan music video a peih leh ta a, a music video thar hi a ti­chhuak nghal.

Tuna Govt. Republic Higher Secondary School-a Class XI zirlai Puipuia chuan kumina a music video hmasa ber ‘Min hruai zel ang che’ chu a tichhuak ta. He music video hi hla phuah thiam lar Parpuii hla phuah a ni a, a phuahtu leh a satu aṭang ngawt pawh hian ngaihthlak chian a tichakawm lehzual hle.

Puipuia hi kum lamah la naupang mah se, music lamah chuan hnuhma min hnutchhiah hnem ta viau a, a lawmawm­in a ropui hle. Tuna a music video tihchhuah ‘Min hruai zel ang che’ tih hi a music video pangana tur a lo ni tawh. Nikum khan ‘A rei si lo’ video a tichhuak a, kha kha a kuthnu hnuhnung ber a ni a, kumin­ah a rawn chhunzawm leh a ni.

2015 Mizo Idol top 3 Puipuia hi a music video tihchhuah a nih theih nana amah puitute chungah a lawm hle. Music hi Blue Wave Records kutchhuak a ni a, video hi Tea Chhakchhuak siam a ni. Heng mite bakah kawng engkima puitu Josua te chungah a lawm hle a, he hla phuahtuin a hla phal taka a saktir avangin Puipuia’n chuan a lawmzia a sawi bawk.