Sum lakluh tlem ber kar

Box office lamah chuan film lian tih­chhuah a awm lo bawk nen, mo­vie theatre-te a roin a ro ngawih ngawih a ni ber mai. Expert-ten an beisei ai chuan kar tawp chhung khan sum lakluh tam mah se, Labor Day weekend tawh zawng zawnga sum luh tlem ber ṭum a ni.

North American box office-ah chuan The Hitman’s Bodyguard chu pakhatnaah a rawn kir leh a, a sum lakluh belh hi, Zirtawpni aṭanga Pathianni thleng khan USD mtd 10.2 chauh a ni. Thawh-ṭannia a sum lakluh chhut tel a la ni lo a, Thawhṭannia mi nen chuan USD mtd 12.9 lalut tling tura beisei a ni.

Labor Day tia US-in an serh a, sorkar pisa chawlh atana an hmanṭhin chu September thlaa Thawhṭanni hmasa ber a ni. Movie lamah pawh Thawhṭanni thlenga phuartu awm loa awm âwl theih a nih avang­in sum hmuh ṭhat deuh beisei a ni ṭhin a, kumin chu eng ruai a ang lo. Annabelle: Creation chu pahnihnaah awmin, Zirtawpni aṭanga Pathianni thleng khan USD mtd 7.3 a lalut. Wind River chuan USD mtd 5.9 a lalut.

Expert-te sawi dan chuan Labor Day weekend an tih, Labor Day (Thawhṭanni) hma chiah weekend chhunga movie ten kum 1998 hnua sum an lakluh tlem ber ṭum a ni. Kumin nipui hun chhunga movie tihchhuah tena sum an thawh­chhuah tawh zawng zawng hi USD tld 3.8 a ni a, kum 2016 aiin za zela 15 ngawtin sum an lalut tlem zawk.

Box office movie

“The Hitman’s Bodyguard” - $mtd 10.2

“Annabelle: Creation” - $mtd 7.3

“Wind River” - $mtd 5.9

“Leap!” - $mtd 4.9

“Logan Lucky” - $mtd 4.4

“Dunkirk” - $mtd 4.1

“Spider-Man: Homecoming” - $mtd 3.6

“The Emoji Movie” - $mtd 2.45

“Despicable Me 3” - $mtd 2.4

“Girls Trip” - $mtd 2.3