CMA Awards Keith Urban leh Miranda Lambert

Country Music Association chuan CMA Awards an sem hun a hnai leh tawh a, nomination list pawh an tichhuak ta. Nomination list an tih­chhuahah hian Keith Urban leh Miranda Lambert chu a langsar ber an ni.

51st CMA Awards nomination list tihchhuah­ah hian Keith Urban leh Miranda Lambert te hi category pangaah ve ve an lang a, category pathum­ laiah an pahnih hian an lang kawp a, chungte chu Music Video of the Year, Single of the Year leh Song of the Year-ah te a ni.

An lan kawpna bakah hian Miranda Lambert hi Female Vocalist of the Year-a nominate a ni bawk a, he category-ah hian a lo lang fo tawh a, heta ṭang hian a zawnin award pawh vawi ruk ngawt a lo la tawh a ni.

Little Big Town chu lang hnem lehin, category paliah an lang. Taylor Swift pawh a rawn lang ve leh. Country aṭanga pop lama inher rem ta zawk mah Taylor Swift hi CMA Awards-ah hian a hming a lang ve leh a, kum thum hnua he awards nomination-a a lan ve lehna hmasa ber a ni. Taylor Swift hi direct-a lang chu a ni lo, Little Big Town hla hit zet mai ‘Better Man’ chu a phuah a ni a, he hla hi Single of the Year-ah te, Song of the Year-ah te, Music Video of the Year-ah te a lang.