Khawvel university ṭha zingah India zirnate a hnufûm Zirna in ṭha a tarlanah US-in a thawhhlawk

World University Ranking tihchhuah thara top 1000 chinah India rama zirna in 30 chiah a lang a, a thleng sang ber chu Indian Institute of Science (IISc) niin, chu pawh nikum aiin kumina a dinhmun a hniam zawk. IISc hi 251-300-ah a lang a, nikum kha chuan 201-250-ah a lang thung. He list-a India rama zirna in lang zingah IIT Bombay chu 351-400-ah a lang a, IIT Delhi, IIT Kanpur, IIT Kharagpur leh IIT Roorkee te chu chu 501-600-ah an lang. 601-800 zingah Aligarh Muslim University, Banaras Hindu University, University of Delhi, IIT Guwahati, IIT Madras, Indian School of Mines, Jadavpur University, National Institute of Techno­logy Rourkela, Punjab University, Savitribai Phule Pune University leh Tezpur University te an lang a, hengho hi a thleng sang chin an ni.

A pumpuia zirna in ṭha bera thlan chhuah chu Oxford University a ni. University of Cambridge chu pahnihna a ni a, California Institute of Technology chu pathumna niin, US-a mi tho Stanford University chu pathumna bawk a ni. Massachusetts Institute of Technology, US; Harvard University, US; Princeton University, US; Imperial College London, UK; University of Chicago, US; ETH Zurich - Swiss Federal Institute of Technology Zurich, Switzerland leh University of Pennsylvania, US te chu top 10-a langte an ni.

Ram malah US-a zirna in 62 zet World University Ranking-a zirna in top 200 zing­ah an tel a, ram mala thawhhlawk ber a ni. United Kingdom-a zirna in 31 zet a lang a, Germany aṭangin 20, Netherlands aṭangin 13, Australia aṭangin 8, China leh Switzerland aṭangin 7 ve ve, Canada, France leh Sweden aṭangin paruk ṭheuh, Hong Kong aṭangin panga, leh, Belgium leh South Korea aṭangin zirna in pali ve ve niin, hengte hi ram mala thawhhlawkte an ni.

Times Higher Education hian khawvela zirna in sang 20,000 chuang awm zinga a ṭha zual 1,000 a thlang chhuak. Tehna hrang hrang hman a ni a, teaching, research (volume, income leh reputation), citations (research influence), international outlook (staff, student leh research) leh Industry income (knowledge transfer) te chu an tehna langsar a ni.