Top 3 intihsiak zan khatna a zo ta
Mizo Idol season 7 hmawr bawk a hnai ta hle mai. Thawhlehni zan khan Top 3-te chuan intihsiak zan khatna neiin hla pahnih ṭheuh hmangin an intihsiak. Zirtawpni zanah a tawp nan hla pakhat ṭheuh hmangin an intihsiak leh ang a, chumi zan vekah chuan Mizo Idol kan hre tawh dawn.
Top 3 intihsiak zan khatnaah hian Mizo Idol season 8-a palina Teawmi leh pahnihna Mami Hnamte te an inlan. Anni inlan zawh hian Zonet leh Fame Entertainment buatsaih Mizo Girl Group survival contest winner IVY'Z-te an inlan bawk. Anni inlan zawhah hian intihsiakna ṭan a ni.
Contestant zinga mipa awm chhun ni tawh David Lalchawisanga Darlong chuan Top 3 intihsiakna rawn khuh hawngin Daduhi hla 'Ka hmangaih che' tih a sa a, a hla hnihnaah RP-a Ralte hla 'Chhuihthangvala lu a hai' a sa bawk.
Hunthar veng nula T Vanlalhmangaihi chuan Mangheta Chinzah 'Lo let la ka kiangah' leh Jt Production hla 'I tan' hmangin Mizo Idol nih tumin stage a rawn mawi ve bawk a ni.
Gospel singer awm chhun C Vanlalroluahtumi chuan Albatros Hmingpuia hla 'Tunge' leh Realistic hla 'Van In' hmangin intihsiakna a hmachhawn ve thung.
Contestant 400 chuang aṭanga a ṭha thlan chhuah pathum inel an ni tawh bawk a, an zai thiam hlawm tak zet. An zai a ngaihnawm a, judge-te tan pawh a luhai thlak hle dawn tih a chiang.
Endiktu zinga mi Vari'n Davida zai zawha,"Chhuihthang vala chauh ni loin, kan lu a hai ve a ni, keimahni pawh hi," tia a sawi khan Top 3 zinga a ṭha ber thlan chhuah leh a harsat turzia chu a tichiang awm e.
Mizo Idol 2022 kan hre ṭep tawh
Top 3-te zai hi social media platform hrang hrangah dah chhuah nghal niin chumi hmang chuan vote a thlak theih reng tawh a, tin, Zirtawpni zan, Grand Finale zanah hian a zan hnihna atan an intihsiak leh dawn bawk a, result puan nghal a ni ang.
Kan duh vek tawh che u a... Zofate in lakah kan inlungrual viau laiin hmun thumah kan inṭhen bawk si, a buaithlak khawp mai..Chhuihthang vala chauh ni loin, kan lu a hai ve a ni, keimahni pawh hi... - Vari
Top 3-te Mizo Idol-a an tel chhoh dan chu
"Mizo Idol hi ka tet te aṭanga tel ka lo chak vena ṭhin em em kha a ni a, hetah zirzawm tura ka rawn awm tak siah chuan remchanga lain, tel kha ka chak em em mai a. Amaherawhchu mahni insit a na bawk si a, kei aia zai thiam tak tak kha an tel dawn tih ka hre si a, keimahah khan 'true courage' ka nei thei lo. Ka ṭhianpain tel turin min nawr lui a... Ka class kal tur kha (form) fill-up turin min nawrlui a... aman engkim a buaipui vek a, a chungah pawh ka lawm em em a ni." - David Lalchawisanga Darlong
"Mizo Idol hi an buatsaih dawn tih ka hriat aṭang khan tel ka tum nghet ta bur mai a ni. Hman ni lawka an buatsaih Seki band contest-ah khan ka tel ta a, Seasawng VC-te'n duhsak tak maiin min sawm a, Mizo Idol-a tel ka tum avangin ka skills develop-na atante leh ka aw tih fitna atante ka tel a, sang tak thleng lo mah ila keimahah 'improvement' nasa tak ka nei." - T Vanlalhmangaihi
"Mizo Idol-ah hian a tirah phei chuan tel ka duh lo a, a chhan chu mahni insit kha a nasa ve lutuka. Mahse zai lama min tuipuitute'n min buaipui a, form-te min lo laksak a, min fuih nasa em em a. Anni zarah tun dinhmun hi ka rawn thleng chho a ni." - C Vanlalroluahtumi