Comedian Raju Srivastava a thi

Indian fiamthu thiam Raju Srivastava chu nimin khan kum 58 mi niin Delhi-ah a thi.

Raju hi August 10 khan a awmah na a neih avangin leh gym-a a workout laia nikhaw hre loa a tluk avangin AIIMS Delhi-ah dahluh a ni a, ni 41 lai enkawl a nih hnuah a thi ta a ni.

Heart attack vang a nih thu doctor-te chuan sawiin thla khat chuang ventilator a hmang. Tun hnai lawk khan a unaupa Dipoo Srivastava chuan nikhaw hre loin awm reng mah se hma a sawn hret hret tih sawi mah se nimin khan a thi ta a ni.

1980's chho aṭang tawh khan Raju hian entertainment industry hi a luhchilh tawh a, reality stand-up comedy show The Great Indian Laughter Challenge 2005 aṭang khan ram pum huapin hriat a hlawh chauh thung.

Hindi film lar tak tak - Maine Pyar Kiya, Baazigar, Bombay to Goa leh Aam-dani Atthani Kharcha Rupaiya-ahte pawh inlanin Film Development Council Uttar Pradesh chairman-te pawh a ni tawh a ni.