Dior leh Gucci ten model chêr an hmang tawh dawn lo
French fashion house lian leh lar, high end fashion lama khawvel hriat hlawh Christian Dior hian tunhnai khan Maria Grazia Chiuri chu an creative director-ah an ruat a, hemi hnu hian an ke pênna lam an thlak a, an awmna fashion group duh dan an zawm tawh dawn.
Christian Dior-in model chêr lutuk an hmang tawh dawn lo tih an puan mek laiin Italian fashion house lian, Gucci pawhin model chêr an hmang tawh dawn lo tih an puang ve bawk.
Dior leh Gucci mai bakah heng brand pahnihte awmna luxury fashion group hnuaia brand dangte pawhin model chêr hi an hmang tawh dawn lo vek. Luxury fashion group pahnihte hi Kering leh LVMH te an ni. Kering hnuaiah hian Gucci bakah Yves Saint Laurent, Balenciaga, Alexander McQueen, Bottega Veneta, Boucheron, Brioni te, Puma leh Volcom te pawh an awm. LVMH hnuaia awm zingah Dior, Givenchy, Louis Vuitton, Celine te chu a langsar zual an ni.
Heng group pahnihte hian an hnuaia brand hrang hrang, puitling thawmhnaw leh inbel chi tilara fak turin kum 16 hnuai lam an hmang tawh dawn lo tih an sawi bawk. He dan hi Paris Fashion Week neih tur aṭangin hman ṭan a ni ang. Hemi zawm lo company emaw brand emaw chuan £70,000 thleng an chawi a ngai dawn a, an brand hotu pawh thla ruk chhung thlengin lung in tân theihna a ni dawn.
Hetianga fashion group pahnihin thutlukna an siam chhan ber pakhat chu France ram dan vang a ni. Kum 2015 khan France chuan dan siamin, model reng reng chu an hriselna, an kum, an rih zawng leh taksa pianah te doctor pawmpuina a ngai tawh tiin a sawi.