Artist 100-ah Taylor Swift pakhatna

Beisei lawk ang ngeiin a hla ‘Look what you made me do’ chu Billboard Hot 100-ah pakhatna a luah a, hei mai bakah hian Billboard Artist 100-ah Taylor Swift chuan pakhatna a luah bawk.

Mariah Carey fan-te ṭhahnemngaihna mai bakah Taylor Swift hla thar leh West chhungkua innekna hian thawm a nei lian a, chuvang chuan Swift hla thar ‘Look what you made me do’ chu Billboard Hot 100-ah pakhatna a luah chiang hle. He hla hi hralh a kal avang te, streaming lamah te pawh a chet ṭhat avangin Taylor Swift chu Billboard Artist 100-ah pakhatna a nih phah.

Billboard Artist 100-a Swift-i’n pakhatna a luah hnuhnun ber chu kum 2015 July 11 khan a ni. He chart bik, zaithiamte chet ṭhat dan tehna hi kum 2014 aṭang khan Billboard hian a siam a, hralh hnem dan te, miin an sawi dan te, radio-a play hnem leh hnem loh, social media-a an share nasat dante aṭanga teh a ni.

Heti hian Taylor Swift hi Billboard Artist 100-ah a vawi 32 nan pakhatna a luah leh a, zaithiam zinga pakhatna luah ngun ber a ni. Pakhatna luah ngun ber dawttu chu Drake a ni a, vawi 25 pakhatna a ni a, The Weeknd chu vawi 14 lai pakhatnaah a awm.