Justin Bieber, Sofia Vergara, Drake ten Hurricane Harvey Telethon zawm ve dawn

US chhim lam nuaitu thlipui, Hurricane Harvey in chhiatna nasa tak a thlen avanga ṭanpuina sum, mipuiin an thehchhuah theih nana hun hman hona chi khat, Hurricane Harvey Telethon- ah Justin Bieber, Sofia Vergara, Drake ten an tel ve dawn tih an tichiang ta.

Scooter Braun leh Bun B te hmalakna a vehbur khawnna "Hurricane Harvey Telethon" ah hian Robert De Niro, Billy Crystal , Faith Hill, Beyonce Knowles, George Clooney, Oprah Winfrey, Julia Roberts, Reese Witherspoon, Barbra Streisand, George Strait, Jamie Foxx, Karlie Kloss, Rob Lowe, Matthew McConaughey, Dennis Quaid, Kelly Rowland, Adam Sandler, Ryan Seacrest, Michael Strahan, and Blake Shelton ten an tel tur an lo tichiang tawh bawk.

September 12, Thawhlehni khian darkar khat awh tur "Hand in Hand: A Benefit for Hurricane Harvey Relief" tih chu Los Angeles, New York leh Nashville atangin US-a TV channel lar hrang hrang ABC, CBS, NBC, FOX leh CMT kaltlangin pekchhuah a ni ang.

Hurricane Harvey in US chhimlam a nuai vang khan mi 63 velin nunna an chan a, in leh lo neilo tam tak an awm mek. Chhiatna thlen hnu lawk aṭang khan milar hoin sum an thehchhuak tawh reng a; chungte chu- Miley Cyrus, Ellen DeGeneres, Taylor Swift, Justin Bieber, Sandra Bullock, Chris Brown, Drake, Jennifer Lopez, Alex Rodriguez, Dwayne "The Rock" Johnson, Nicki Minaj leh Kardashian unaute an ni. Tin, Miranda Lambert phei chuan chhiatna bawrah hian ui za chuang zet leh ran vulh ṭhahnem tak a chhan chhuak tawh a ni.

Hurricane Harvey avanga tuarte ṭanpuina tur sum a luh belh zel a. Jimmy Fallon leh The Tonight Show chuan ṭanpuina tur sum an pek tur thu an puang ve leh ta. Jimmy Fallon hian The Tonight Show chuan USD mtd 1 an thawh tur thu a puang a, pawisa hi JJ Watt-a relief fund-ah an pe lut dawn tih a sawi. NFL star JJ Watt hian Texas-a tuartute ṭanpuina tur hian relief fund a siam a, hetah hian USD mtd 18 zet a lut tawh. Pawisa hmang hian ei tur, tui in tur leh mipuite mamawh lei a ni ang.

Green Day pawhin USD nuai khat an thawh thu an puang ve bawk. Anni bakah hian Solange Knowles te, Fall Out Boy te pawhin pawisa an thawh thu hi an puang chhuak bawk.