Fashion khawvelah Cindy Crawford fanu inlan ve ta

Mizo upain sial rangin sial rang a hring an tih ang deuhin Super model lar, chuai thei lo Cindy Crawford fanu Kaia Gerber chuan a nu hnungzuiin Ningani khan New York Fashion Week-ah a inlan ve ta. Kum16 chauha upa Kaia hi fashion khawvela a inlan vawikhatnaah hian lawm a hlawh hle. Incheina khawvela kan hriatlar 'Calvin Klein' thawmhnaw pholanna hunah hian Kai Gerber hi a khuhhawngtu a ni nghe nghe.

He hunah hian milar tak tak, Jake Gyllenhaal, Anna Wintour, Christina Ricci Brooke Shields, Lupita Nyong'o. Mahershala Ali, Kate Bosworth, Millie Bobby Brown leh Paris Jackson te chu tlar hma lama ṭhu langsar zual an ni.

Show neih hma ni khan kum 51 a upa, Cindy Crawford chuan a fanu inlan tur vangin a zam lem lo tih sawiin, " I pheikhawk keartui i rap tliak a nih pawhin nui mai ang che, tih theih dang a awm chuang lo, thil thleng thei pakhat ve mai a ni" tiin a lo fuih tawh.

Tunhnai khan Kaia hian a chhungte leh ṭhiante nen, a kum 16 tlin champha hi Malibu, California-a an inah an lawm a. A piancham pha lawmna kal zelah America khawchhak lam vaukam hrutin, Nwe York City-a Alexander Wang ahte a bazar zuai zuai tawh a ni.