Gay character awmna Turkish series NETFLIX-in titawp

Netflix chuan gay character awmna Turkey series thar tur an buaipui mek chu Turkey tualchhung thuneitute'n an dodal avangin filming bulṭan mai tawh tur chu an titawp.

Turkey politics leh sakhuana lama hotute'n LGBT an dodal avangin Turkish drama series production hi an titawp ta a ni. He series hi 'If Only' tih a ni a, hmeichhe pakhat pasal nei tawh hlim lo tak, hun(time) danga zin chanchin a ni a, film pawh hi an chang ṭan hman ṭep tawh tihah kar hmasa khan Netflix chuan tawpsan turin an thutlukna an siam ta a ni.

'If Only' creator Ece Yörenç chuan  Turkish film website Altyazi Fasikul-ah gay character vangin film chan phalna pek an ni lo tih leh chu chu hun la awm zel turah pawh thil hlauhawm tak a nih thu a sawi.

Netflix hi a hma pawhin Turkey-ah hian a show tihchhuah tur a lo ṭhulh tawh bawk a, April thla khan 'Love 101' tihchhuah an tum chu gay character awm vang bawkin social media-ah boycott tumna post a tam avangin an lo ṭhulh tawh bawk.

Hemi thla hian an  state religious affairs directorate head, Ali Erbas chuan homosexuality chuan natna leh corruption a thlen a ni, tiin a lo sawi hial. He a thusawi avang hian nasa taka dotu awm mah se President Tayyip Erdogan chuan thlawpin Erbas thlavang a hauh nghe nghe.

LGBT community-te hi khawtlang lam ram tam takin pawm viau tawh mah se Middle East ramte chuan an la pawm lo hle a, Turkey hi hemi chungchanga liberal ber pawl niin dan eng eng emawte pawh LGBT chungchangah hian zam tawh mah se an rilru tak tak chuan an la pawm lo hle tih a hriat a ni.