Don Williams Country singer ropui kan chân

'Kan chân' tih hi Mizote zingah pawh hman a inthlahrunawm loh khawp ang. Khawvel huapa country singer lar leh hlawhtling, Mizote thleng pawha 'kan' lung tilengtu ṭhin Don Williamschuan Zirtawpni khan chuap ṭha lo avangin (chronic obstructive pulmonary desease) avangin he khawvel a chhuahsan ta.

Country music khawvela a ropui em avanga 'Gentle Giant' tia an koh ṭhin Don Williams, Donald Ray Williams hi kum 78 mi niin Zirtawpni khan a thi a, a thih thu hian khawvel chu a nghawr chhuak nghal a, zaithiam leh mi ropui hrang hrangten an uizia an tlangaupui.

Texas chhuak Don Williams hi kum 1939 May 27-a piang kha a ni a, kum 1958 khan Portland, Texas aṭangin a graduate. Kum 3 mi lek a nih lai aṭang tawhin music khawvelah hian a intat lut tawh a, talent contest leh inzaisiakna hrang hrangah te lawmman a dawng hnem tawh hle. A tleirawl chhuah aṭangin music pawh a tuipui lehzual hle a, tualchhung band satliah ve deuh deuhah pawh a tel ṭhin.

Kum 1960 khan nupui a nei a, fa an nei zui a, hetiang a nih avang hian chhungkaw châwm nan hna chi hrang hrang, tuialhthei laihchhuahnaah te, bill khawntuteah a thawk ve lawp lawp ṭhin. Kum 1964 khan, Texas-a Corpus Christi-a a awm laiin The Pozo Seco Singers an din a, folk lam pang music an la play. He band aṭang hian hriat a hlawh chho

ṭan a, 'Time' hla chu a hlawhtling hle a, an band hi kum 1969 khan an tawp.

Hemi hnu hian Don Williams hi Nashville-ah kalin, hla phuah lamah contract a hmu a, kum 1972 khan JMI records-ah music recording deal a hmu hlauh mai. Kum 1973 khan The Shelter of Your Eyes a tichhuak a, a hlawhtling hle a, chart lamah pawh hlawhtlinna a chang chho ṭan. Kum 1974 aṭang khan chart-ah pakhatna a luah chho ṭan a, chart-a pakhatna a nihpui hmasa ber chu 'I Wouldn’t Want To Live If You Didn’t Love Me' kha a ni. Heta ṭang hian kum 1991 thleng khan a single tihchhuah apiang chu Billboard Country Chart-ah top 40 thlen loh a awm ta ngai lo.

Music khawvelah hlawhtlinna a chang chho zel a, chutihlai chuan a lo upa ve ta deuh deuh. Country music chhunga 'Gentle Giant' an tih hian a kum a upat tak avangin kum 2016 March thla khan music a chawlhsan thu a puang a, show neih tura ruahmanna a lo siam tawh zawng zawng pawh a ṭhulh ta a ni. Music khawvel a chawlhsan hma hian album, live album leh compilation te nen vek, 40 zet a tichhuak hman.