The Rolling Stones-in Jimmy Page an thawhpuina An hla thulkhung an tlangzarh

The Rolling Stones chuan Nilaini khan an hla thulkhung, kum 1974-a Led Zeppelin guitarist, legend Jimmy Page leh Blind Faith member Rick Gerch an thawhpuina 'Scarlet' lyric video an tlangzarh.

The Rolling Stones hian kum 1973-a an record 'Goats Head Soup' reissue-na khuhhawnna atan 'Scarlet' hi an tlangzarh a, an hla la tlangzarh ngaih loh pathum an tlangzarh dawn tih an sawi bawk. 'Scarlet' hi ngaihthlak mai pawhin an record-na a rei tawh tih a hriat hle a, YouTube lamah hian Stones hian 'Scarlett' hla chungchang an sawina video clip tawite nimin lamah khan an dah lehnghal bawk a, Jimmy Page thusawite pawh hetah hian an dahlang a ni. Rolling Stones guitarist Keith Richards chuan 'Scarlett' an record lai chu a ngaihtuah let tih sawiin Zeppelin session zawhah an luh thu leh, Zeppelin band member-te chu an chhuah mai laiin Jimmy chuan awm ve rih a duh tih a sawi. A tirah chuan track ang chiaha siam pawh an tum lo a, demo leh demonstration mai mai ang tura an siam a nih laiin an beisei aiin a chhuak ṭha ta si tih a sawi.

Mick Jagger pawhin Ronnie-a basement studio-a Jimmy leh Keith-te nena an jam ho hmasak ber ṭum chu a la hre reng tih leh session nuam tak a nih thu a sawi a ni. Rolling Stone album 13-na 'Goats Head Soup' reissue hi format hrang hrangin an zuar chhuak leh tawh a, streaming service hrang hrangah pawh ngaihthlak turin a awm leh thuai hmel.