Ṭhazual Awards Zaithiamten an vote tawh dawn

Kum tina sem ṭhin, Ṭhazual Awards chu sem tura ruahmanna siam mek a ni a, kum danga an tih loh danin kumin hian voting system pawh tih a ni dawn.

Ṭhazual awards hi October thlaa sem tura ruahman a ni a, thil thar a awm nual a, chung zingah chuan voting system a ni. Kum dangah chuan thlan bik mi ṭhenkhatten an vote a, kuminah erawh chuan zaithiamten Android application hmangin an vote ang. Ṭhazual Awards buatsaih­tute chuan Android App hi siamtirin, he application hmang hian zaithiam vêk ten vote an thlak ang.

Nikum aṭang khan Dou or Group category siam a ni a, kuminah he award hi phel sînin, Gospel leh Lengzema ṭhen a ni a, chutiang bawkin Best Music Video pawh Gospel leh Lengzemah te ṭhen a ni. Duo or Group category-ah hian duet bakah, group zai te, band te pawh a tel thei dawn a ni. Kumin hian a pumpuiah category 10 a awm ang.

Category awm turte hi Best Male Artist Gospel, Best Female Artist Gospel, Best Male Artist Lengzem, Best Female Artist Lengzem, Best Music Video Gospel, Best Music Video Lengzem, Best Duo/Group Gospel, Best Duo/Group Lengzem, Best New Artist Gospel leh Best New Artist Lengzem te a ni.